Доктарку аштрафавалі за герб Літвы на аўто. Жанчына не клеіла налепку на машыну — так прыехала з Літвы
12 кастрычніка суд Кастрычніцкага раёна Віцебску разгледзеў адміністратыўную справу паводле арт. 24.23 КаАП, заведзеную на доктара-пульманолага Марыну Бурбліс. Яе прызналі вінаватай у парушэнні заканадаўства аб масавых мерапрыемствах за налепку герба Літвы на багажніку аўто. На судзе стала вядома, што крышка багажніку была «няродная», яе мянялі ў Літоўскай Рэспубліцы. На ёй засталася налепка з гербам гэтай краіны. Адвакат прасіў не пазбаўляць медыка свабоды, бо яна працуе ў чырвонай зоне, паведамляюць праваабаронцы.
Справу разбіраў суддзя Уладзімір Царыкаў.
Паводле рапарту супрацоўніка Кастрычніцкага РАУС Віцебска, інфармацыя пра аўтамабіль «Опель Вектра» з Пагоняй на багажніку паступіла 14 кастрычніка. Амаль праз тыдзень, 20 кастрычніка, быў праведзены агляд аўтамабіля і складзены пратакол агляду.
На першым судовым пасяджэнні, якое адбылося 2 лістапада, муж Марыны Бурбліс патлумачыў, што крышка на багажніку была замененая. Яе прывезлі з Літвы, мужчына паказаў на судзе перапіску з прадаўцом.
На судзе ў якасці сведкі выступіў непасрэдны начальнік жанчыны — выканаўца абавязкаў загадчыка першага тэрапеўтычнага аддзялення Віцебскай гарадской цэнтральнай паліклінікі Вадзім Парфенцьеў.
Ён ахарактарызаваў сваю падначаленую станоўча, паведаміў, што Марына Бурбліс ад самага пачатку пандэміі ў складзе брыгады выязджала да хворых на кавід. Цяпер таксама працуе ў чырвонай зоне.
Суддзю Царыкава цікавіла, ці абмяркоўвала на працы доктарка палітычныя тэмы і ці не стаяў у яе кабінеце бел-чырвона-белы сцяжок. Загадчык аддзялення адказаў, што нічога не бачыў, ніякіх палітычных тэм у аддзяленні не абмяркоўваюць.
Адвакат Марыны заявіў, што літоўскі герб жанчына не стала здымаць з багажніка, каб не пашкодзіць пакрыццё аўтамабіля, а таксама што сімвал Пагоня не прызнаны экстрэмісцкім або забароненым.
Зазначыў, што падчас пандэміі галава ягонай падабароннай была занятая зусім іншымі пытаннямі, звязанымі з працай.
Адвакат прасіў, каб у выпадку, калі Марыну Бурбліс прызнаюць вінаватай, яе не адпраўлялі за краты, бо ёй трэба дапамагаць хворым на COVID-19.
Суддзя Уладзімір Царыкаў прызнаў лекарку вінаватай і прыняў рашэнне аштрафаваць жанчыну на 50 базавых велічынь (1450 рублёў).
Прысуд можа быць абскарджаны ў абласным судзе.
Каментары