Увечары 4 студзеня зламыснікі праніклі ў дом індывідуальнага прадпрымальніка ў Пінску, звязалі яго жонку і 11-гадовую дачку і пад пагрозай зброі запатрабавалі грошы. Не разгубіўшыся, мужчына здолеў націснуць трывожную кнопку.
Праз чатыры хвіліны на месца здарэння прыбыў нарад Дэпартамента аховы МУС. Супрацоўнікі міліцыі заўважылі сляды пранікнення ў жыллё, а таксама мужчыну ў масцы, які схаваўся ў доме. Пазней быў знойдзены яшчэ адзін нападнік, паведамляюць у Следчым камітэце.
Падазраваныя аказалі актыўны супраціў праваахоўнікам — нават спрабавалі забраць табельную зброю аднаго з міліцыянтаў. Міліцыянты вымушаныя былі страляць. У выніку дваіх нападнікаў затрымалі, яны атрымалі агнястрэльныя раненні. Аднаму з іх 32 гады, другому — 29. Цяпер яны шпіталізаваныя, палата ахоўваецца канвоем. Ім пагражае да 15 гадоў за рабаванне.
Ніхто з сям’і бізнэсоўца не пацярпеў.
Агулам нападнікаў было чацвёра, паведамляе міліцыя Брэсцкай вобласці. Яшчэ двое збеглі з месца злачынства, але іх таксама затрымалі.
На месцы знайшлі помпавую стрэльбу і грошы, якія начныя «госці» забралі ў бізнэсмена. Нападнікі хацелі забраць 11,5 тысяч даляраў.
Нагадаем, у лістападзе невядомыя ў масках напалі на баранавіцкую прадпрымальніцу. Яе і ўнука таксама звязалі і патрабавалі грошы, але яна здолела выклікаць міліцыю.
Цяпер чытаюць
Дзмітрый Семчанка: Я прыйшоў у пул Лукашэнкі біцца з Расіяй16
Каментары