30-гадовы ўраджэнец Гродна Сцяпан Свідзерскі вызвалены з ізалятара ў польскім горадзе Гдыня.
Інцыдэнт адбыўся 14 лістапада ў офісе арганізацыі Thomson Reuters, дзе Сцяпан працуе апошнія шэсць гадоў. Па адной з версій, беларус сам адкрыў стральбу, па іншай — на яго напаў адзін з супрацоўнікаў кампаніі, калі пабачыў зброю. Прагучалі два стрэлы, ніхто не пацярпеў.
Апошнія тры гады Свідзерскі актыўна займаўся стральбой. Праводзіў на трэніроўках увесь вольны час.
«На жаль, існуе таямніца следства, таму не магу агучыць падрабязнасці здарэння, — сказаў Свідзерскі для «Нашай Нівы». — Яшчэ высвятляюцца пэўныя моманты. Галоўны вынік, што я на волі без дадатковых абмежаванняў, такіх як падпіска аб нявыездзе ці паліцэйскі нагляд. Я рады такому выніку».
У ізалятары Сцяпан сядзеў у камеры на трох чалавек, але адзін. «Быў час добра выспацца. Умовы цалкам прыстойныя. Ніякага стаўлення да мяне як да тэрарыста не было. Паліцыя была вельмі карэктнай».
Пра бліжэйшыя планы Сцяпан таксама не можа гаварыць. Што будзе з працай, ці не ўзнікне там праблемаў, пакуль не ведае. Кажа, што цяпер галоўнае жаданне — хутчэй дабрацца дадому.
Каментары