Сябра Партыі БНФ, кіраўнік Кобрынскай суполкі Аляксандар Мех, які зьяўляецца адзіным кандыдатам у сьпісе АДС, звольнены з працы на АТТ «Белтрансгаз».
30 чэрвеня не працягнуты кантракт з Алесем Мехам, cупрацоўнікам Кобрыньскай управы магістральных газаправодаў ААТ «Белтрансгаз».
Спадар Мех зьяўляецца актывістам Партыі БНФ. Сваё звальненьне ён наўпрост зьвязвае з палітычнай дзейнасьцю
— 6 чэрвеня я быў выкліканы да кіраўніка прадпрыемства і ў прысутнасьці супрацоўніка КГБ папярэджаны, што калі ня выйду са сьпісу 110 кандыдатаў ад Аб’яднаных дэмакратычных сіл на восеньскіх выбарах у Палату прадстаўнікоў, то праз тры тыдні кантракт са мной ня будзе працягнуты. Так яно і здарылася — 30 чэрвеня зь 17.00 я беспрацоўны.
— Што можна зрабіць у такой сытуацыі?
— Саступіць мне было нялатва, — адказвае спадар Мех. — Спэцыяліст я няйначай нядрэнны. І супрацоўнікі нашага калектыву зьбіралі подпісы ў маю абарону, і мой непасрэдны начальнік напісаў ліст у Менск кіраўнікам галаўнога прадпрыемства з просьбай працягнуць са мной кантракт, але выніку, як бачым, няма.
— Алесь Мех мае дзьве вышэйшыя адукацыі. Ён скончыў Полацкі дзяржаўны ўнівэрсытэт, а яшчэ раней Маскоўскі дзяржаўны ўнівэрсытэт грамадзянскай авіяцыі. Быў кандыдатам у атрад касманаўтаў, і чым благі быў бы кандыдат у «палатку», — кажа зямляк звольненага Юрась Жыдовіч.
— Кантрактная сыстэма — гэта ў дадзеным выпадку інструмэнт для расправы з іншадумцамі, — камэнтуе юрыст прафсаюза РЭП Уладзімір Малей. — Судовага рашэньня такія справы ў Беларусі ня маюць, таму што адміністрацыя можа не працягваць кантракт з уласнага хаценьня і не тлумачыць прычынаў.
Паводле ўнутранай статыстыкі, колькасьць беспрацоўных сярод сябраў апазыцыйных партый адпаведнага ўзросту ў Берасьцейскай вобласьці сягае за 50 адсоткаў. Праваабаронцамі зафіксаваныя дзясяткі выпадкаў прымусу да ляяльнасьці на працоўных месцах і забароны на прафэсію для неляяльных прафэсыяналаў.
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне36
Каментары