Давыдзька абурыўся свежым нумарам «Нашай Нівы»: «Апазіцыя складае спісы ворагаў народа»
У чарговым выпуску праграмы «Клуб рэдактараў» старшыня Белтэлерадыёкампаніі Генадзь Давыдзька абурыўся свежай папяровай «Нашай Нівай».
Цэнтрам нумара стала вялікае дасье пра беларускіх «заходнерусістаў». Гэта і выклікала незадаволенасць Давыдзькі.
«На дварэ ХХІ стагоддзе, а ў нас зноў заклікаюць да свяшчэннай нянавісці. Гэта не «Праўда», а «Наша Ніва». Цяпер яна друкуе спіс ворагаў народа. З чацвёртай па восьмую старонку артыкул «Хто хоча зрабіць з Беларусі Заходнюю Расію». Дзясяткі прозвішчаў, якія пасмелі мець іншы пункт гледжання, чым у «Нашай Нівы». Артыкул вытрыманы ў стылі працэсаў 1930-ых гадоў. Газета нават не пасаромелася надзець на сябе кіцель пракурора-абвінаваўцы, запатрабаваўшы ад суда суровага пакарання», — заявіў Давыдзька.
«Ідэалогія заходнерусізму наўпрост варожая беларускай нацыянальнай ідэі ўвогуле ды ідэі самакаштоўнасці беларускай дзяржаўнасці ў прыватнасці», — вось гэтая выснова абурыла кіраўніка БТ.
«Ці апраўданая такая жорсткасць у ідэалагічнай барацьбе?» — запытаўся Давыдзька ў іншых удзельнікаў праграмы, але не знайшоў падтрымкі.
Рэдактар «Савецкай Беларусіі» Павел Якубовіч не ўбачыў у артыкуле жорсткасці. Ён патлумачыў, што «нацыяналістычна арыентаваных публіцыстаў» часам перахлёствае праз іх маладосць. Маўляў, гэта рэакцыя не разумная, але натуральная. Рэальную ж праблему Якубовіч бачыць у дзейнасці прарасійскіх шавінісцкіх рэсурсаў накшталт «Рэгнума».
Рэдактар «Аргументаў і фактаў» Ігар Сакалоў прапанаваў ставіцца да артыкула «НН» як да дыскусіі ў СМІ.
Урэшце Давыдзька ўдакладніў, што не згодны з пунктам гледжання заходнерусістаў, як і «Наша Ніва», але, маўляў, не прымае зацятасць барацьбы.
-
«Мне казалі: ты гаворыш як канадскі эмігрант». Сяргей Шупа расказаў пра Вільню 90-х, параўнанне літоўскай літаратуры з беларускай і адрозненні паміж народамі
-
Лукашэнка паводзіць сябе ў «макдональдсе» як у савецкай сталоўцы. І думае, што гэта крута
-
Пуцін ужо павіншаваў Маджтабу Хаменеі, а Лукашэнка не. Чаго чакае?
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку16
Каментары