10 000 аўтараў у Брытаніі выпусцілі «пустую» кнігу, пратэстуючы супраць выкарыстання штучнага інтэлекту
У кнізе толькі спіс аўтараў.
Каля 10 тысяч аўтараў, у тым ліку нобелеўскі лаўрэат Кадзуа Ісігура, аўтар серыі дэтэктываў «Клуб забойстваў па чацвяргах» Рычард Осман, аўтар экранізаваных неашпіёнскіх раманаў «Павольныя коні» і «Па дарозе з могілак» Мік Геран і аўтарка «Яшчэ адной з роду Балейн» Філіпа Грэгары, апублікавалі «пустую» кнігу ў знак пратэсту супраць таго, што кампаніі, якія займаюцца штучным інтэлектам, выкарыстоўваюць іх творы без дазволу, піша The Guardian.
У «Don’t Steal This Book» («Не крадзі гэту кнігу») адзіным зместам з’яўляецца спіс іх імёнаў. Асобнікі выдання раздаюць наведвальнікам London Book Fair у аўторак — за тыдзень да таго, як урад Вялікабрытаніі павінен апублікаваць ацэнку эканамічных наступстваў прапанаваных змен у заканадаўстве аб аўтарскім праве.
Да 18 сакавіка міністры павінны прадставіць ацэнку эканамічнага ўплыву, а таксама справаздачу аб ходзе кансультацый наконт рэформы закона. Усё гэта адбываецца на фоне незадаволенасці творчых прафесіяналаў тым, як іх працы выкарыстоўваюцца кампаніямі штучнага інтэлекту.
Арганізатар кнігі Эд Ньютан-Рэкс, кампазітар і актывіст за абарону аўтарскіх правоў творцаў, заявіў, што індустрыя ШІ «пабудавана на скрадзенай працы… узятай без дазволу і аплаты».
Ён дадаў: «Гэта зусім не бяскрыўднае злачынства — генератыўны штучны інтэлект канкуруе з людзьмі, на чыіх працах ён навучаецца, пазбаўляючы іх сродкаў да існавання. Урад павінен абараніць творчых людзей Вялікабрытаніі і адмовіцца легалізаваць крадзеж творчых работ ШІ-кампаніямі».
«Зусім не неразумна чакаць, што ШІ-кампаніі будуць плаціць за выкарыстанне кніг аўтараў», — сказала пісьменніца Мэлары Блэкман.
Выдаўцы таксама плануюць запусціць ініцыятыву ліцэнзавання для штучнага інтэлекту на London Book Fair.
Сярод тых, хто выступіў супраць паслаблення закона аб аўтарскім праве, — Элтан Джон, які назваў урад «абсалютнымі няўдачнікамі».
Каментары