Экс-прэм'ер Польшчы, лідар партыі «Права і справядлівасць» Яраслаў Качыньскі заявіў, што згодны на эксгумацыю цела свайго брата-блізнюка — загінулага ў авіякатастрофе пад Смаленскам у красавіку 2010 года прэзідэнта Польшчы Леха Качыньскага, паведамляюць інфармацыйныя агенцтвы.
Яраслаў Качыньскі лічыць скандальным праведзенае ранейшым урадам расследаванне трагедыі. На яго думку, «многія людзі павінны сесці за гэта на лаву падсудных».
Афіцыйная дэлегацыя Польшчы на чале з прэзідэнтам рэспублікі Лехам Качыньскім 10 красавіка 2010 года ляцела на ўрадавым самалёце ў Катынь. Авіялайнер разбіўся, не дацягнуўшы да ўзлётна-пасадачнай паласы аэрадрома Смаленск-Паўночны. Усе 96 чалавек, якія знаходзіліся на борце, загінулі.
Абставіны гэтай трагедыі вывучае абноўленая камісія па расследаванні авіяздарэнняў, арганізаваная Міністэрствам абароны Польшчы. Некалькі месяцаў таму прынятае рашэнне эксгумаваць целы ахвяраў крушэння, каб правесці ўсебаковыя патолагаанатамічныя даследаванні ў галіне таксікалогіі і ДНК з выкарыстаннем камп'ютарнай тамаграфіі. На думку спецыялістаў, гэта дапаможа вызначыць прычыны смерці ахвяр крушэння авіялайнера, аднавіць ход катастрофы і яе прычыны.
З нагоды эксгумацыі цел ахвяр авіякатастрофы меркаванні блізкіх загінулых розныя: адны не хочуць парушаць спакой памерлых, іншыя настойваюць на праверцы. Згодна з заканадаўствам Польшчы, эксгумацыя можа праводзіцца ў перыяд з 15 кастрычніка да 15 красавіка.
Каментары