Баранавіцкая «Грыбная краіна» ўхваляе знішчэнне «сваіх» шампіньёнаў у Расіі
У Расіі бульдозерам раздушылі шампіньёны, якія нібыта везлі з Баранавіцкай гаспадаркі. На грыбы не было дакументаў, акрамя дэкларацыі, якую лёгка можна знайсці ў інтэрнэце.
Дзве фуры з грыбамі (15 і 17 тон) затрымалі 26 снежня ў Растоўскай вобласці. Шампіньёны везлі з Беларусі, але расейцы палічылі, што яны з Польшчы, паведамляе рэгіянальнае ўпраўленне нагляднага ведамства па Растоўскай вобласці.
Адна з партый суправаджалася дэкларацыяй, згодна з якой вытворцам прадукцыі з'яўлялася фермерская гаспадарка з Баранавіцкага раёна. Аднак дакумент не быў зарэгістраваны ў сістэме Расакрэдытацыі, а таксама на тавар адсутнічаў пратакол выпрабаванняў.
У панядзелак амаль 17 тон грыбоў знішчылі на палігоне ў Растове-на-Доне.
— Правільна зрабілі, што знішчылі, - пракаментаваў гэтую сітуацыю Антон Пужэвіч, заснавальнік КФХ «Грыбная краіна». - Дадзены груз не меў ніякага дачынення да нашай прадукцыі.
Па словах Антона, грыбы з яго гаспадаркі заўсёды даязджаюць да месца прызначэння ў Расіі. Груз «Грыбной краіны» мае неабходны пакет дакументаў, а ў «Рассельгаснагляд» гаспадарка прадастаўляе ўсю інфармацыю аб шампіньёнах, што экспартуюцца ў РФ
- Акрамя таго, нашы шампіньёны адгружаюцца толькі ў скрынях з фірмовым лагатыпам, і, калі грыбы расфасаваны ў іншыя скрыні, гэта не наша прадукцыя.
На думку Антона Пужэвіча, дэкларацыю адпаведнасці на прадукцыю «Грыбной краіны» можна лёгка знайсці ў інтэрнэце і раздрукаваць. Атрымлівае такі дакумент і кожны пакупнік грыбоў у самой гаспадарцы. Некаторыя гэтым карыстаюцца і пасля перадаюць дэкларацыю іншым фірмам, лічыць кіраўнік.
— Несумленныя кампаніі з Расіі паказваюць нас як сваіх пастаўшчыкоў, і такія грыбы часам з'яўляюцца нават у маскоўскіх крамах, - растлумачыў Антон Пужэвіч. - Гэта выклікае толькі здзіўленне і прыкрасць.
Цяпер чытаюць
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»12
Каментары