Сёньня раніцай памёр пісьменьнік Юры Юркавец. Яму было 45 гадоў.
Сёньня раніцай памёр пісьменьнік Юры Юркавец. Яму было 45 гадоў.
«Калі сказаць, што гэта была нечаканая сьмерць, г.зн. нічога не сказаць, — зазначае ягоны сябра Зьміцер Саўка. — Гэта быў чалавек моцнага целаскладу, які актыўна займаўся спортам».
Юры Юркавец памёр а 9‑й раніцы 2 жніўня падчас сну. У сьне стаў задыхацца, ня здолеў прачнуцца, жонка выклікала хуткую. Паводле папярэдняга дыягназу, прычынай сьмерці стаў інфаркт.
Зьміцер Саўка падзяліўся ўспамінамі пра Ю. Юркаўца:
Юры Юркавец нарадзіўся 25 лютага 1962 г. у Сьветлагорску. Дзяцінства правёў у в. Чыркавічы Сьветлагорскага р‑ну. На яго моцна паўплываў дзед Мітрафан, які навучыў унука беларускай мове. Дзед быў вельмі дасьціпным чалавекам і добрым апавядальнікам. І, напэўна, яго талент перадаўся ўнуку.
… Па сканчэньні школы Юркавец падаўся ў Санкт‑Пецярбург (тады яшчэ Ленінград), пагатоў тады праз Сьветлагорск ішла чыгунка, і традыцыйна жыхары Ўсходняй Беларусі зьяжджалі ў вялікія гарады. У горадзе над Нявой прайшоў першыя жыцьцёвыя ўнівэрсытэты. Там жа пачаў рабіць першыя літаратурныя накіды. Але хутка вярнуўся ў Беларусь, дзе паступіў на расейскае аддзяленьне філфаку БДУ, які скончыў у 1990 г.
Разам з жонкай разьмеркаваўся ў мястэчка Ільля (Вялейскага р-ну), дзе ў свой час працаваў Алесь Салавей. Ю. Юркавец выкладаў у школе беларускую мову, жонка Эльвіра — расейскую. «Аднаго разу пабачыўшы на ўроку, як паўзе вош па шыі дзіцяці, я зразумеў, што апошняя кропка, што трэба ўцякаць», — згадваў Юркавец. Сям'я вярнулася ў Менск, прабыўшы ў Ільлі год.
Юры Юркавец заняўся бізнэсам, у якім апрацаваў ўсе гады, апошнія дзесяць год займаўся падшыпнікамі.
«Але ягоная душа належала літаратуры, — кажа З. Саўка. -- Юркавец шмат пісаў і чытаў. Ён літаральна страціў зрок на чытаньні кніг. Прыходзіў у госьці, браў з паліцы кнігу, сядаў на канапу і чытаў».
Натуральна, шмат пісаў, па беларуску і па‑расейску. Першая ягоная прэмія — за публікацыю ў часопісе «Дайвінг», сёлета ён атрымаў расейскую прэмію «Блогбастэр».
Бацькі памерлі ў мінулым годзе, адзін за адным. Ад дзеда ў спадчыну засталася пасека, і калі бацька занямог, Юры стаў развозіць гэты мёд людзям.
Па Юркаўцы застаўся сын Антон, выпускнік Коласаўскага ліцэя. Сёньня ён навучаецца ў БДУ н спэцыяльнасьці сэрбская мова.
Апавяданьне Ю. Юркаўца «Рука клясыка»
Каментары