Kali babulka ź siemkami vyrašyć choć niejak uzakonić svaje adnosiny ź dziaržavaj, joj pryjdziecca pradać za dzień 42 šklanki siemak. I heta tolki dla taho, kab «adbić» hrošy za rehistracyju.
U novym Administracyjnym kodeksie admienieny artykuł pra adkaznaść za handal u niavyznačanym miescy. Milicyja bolš nie budzie pastajanna sačyć, ci nie handlujuć u pierachoda mietro siemkami. Da taho ž nieviadoma, chto bolš hetamu paradujecca: milicyjanty, jakija pierastanuć sačyć za babulkami, ci sami handlarki.
Ci adčuli na sabie źmieny ŭ zakanadaŭstvie babulki, Jeŭraradyjo raskazała Tamara Piatroŭna, pradavačka siemak kala univiersamu «Ryha»:
«Usio roŭna milicyja haniaje. Zabirajuć — tady havorać, što za handal u niepryznačanym miescy, spahaniajuć štaf. U hetym hodzie nie zabirali, bo źbiahali. 70 hod — treba biehać. Dla nas luby štraf — heta hrošy. 260 tysiač piensija. Ci možna na jaje pražyć? Pastaiš, niešta pradasi — užo nie prosiš i nie budzieš miłaścinu prasić».
Alaksandr Łastoŭski, supracoŭnik pres‑centra HUUS Minharvykankamu, raskazaŭ Jeŭraradyjo, što ŭžo z 1 sakavika milicyja nie maje prava nie toje, kab zabirać pradukcyju babulek, ale i navat zhaniać ź miesca prodažu:
«Zaraz u Administracyjnym kodeksie nie praduhledžana adkaznaść za handal u niepryznačanych miescach. Adpaviedna, hetaje pytańnie vychodzić z‑pad jurysdykcyi milicyi. Maksimum, što mohuć zaraz zrabić milicyjanty, — heta niejak papiaredzić ab adkaznaści, paprasić syjści ź miesca. Inšyja prablemy — padatkovaja i sanepidemstancyja».
Major Kazak, staršy inśpiektar pastarunku kala Kamaroŭskaha rynku, raspavioŭ, što milicyjanty tolki prapanoŭvajuć handlaram svajoj pradukcyjaj pierajści na rynak:
«Milicyjanty tolki papiaredžvajuć pra adkaznaść pierad padatkovaj. Taksama prapanujuć pierajści handlavać na rynak».
Babula Zoja, jakaja handluje kvietkami kala Kamaroŭskaha rynku, raskazała Jeŭraradyjo, što ŭ hetym hodzie staŭleńnie milicyi nasamreč stała bolš pamiarkoŭnym:
«Prahaniajuć — źbiahajem. Kali‑nikali zabirajuć i zvoziać u milicyju. Zabirali kvietki. Štrafy płacili. U hetym hodzie niejak bolš spakojna».
Adnak ža rassłablacca babulkam pakul rana — zaraz zamiest milicyi spravami handlu na vulicy zojmiecca padatkovaja inśpiekcyja. U kožnym rajonie horada navat isnuje śpiecyjalny rejdavy adździeł. Tak, z pačatkam dziejańnia novaha kodeksu pa artykule «Niezarehistravanaja dziejnaść» užo byli aštrafavany niekalki taksistaŭ.
Volha Mulavina, namieśnica načalnika rejdavaha adździeła padatkovaj inśpiekcyi Savieckaha rajona Minska, dzie i znachodzicca Kamaroŭski rynak, patłumačyła Jeŭrapiejskamu radyjo, što z boku padatkovych zakonaŭ babulek mohuć aštrafavać na 1,5 miljona rubloŭ:
«Praduhledžana adkaznaść za niezakonny zaniatak pradprymalnickaj dziejnaściu. Bieź dziaržrehistracyi, biez dazvołu — štraf ad 10 da 50 bazavych vieličyń z kanfiskacyjaj».
Adzinym vyjściem dla babulek źjaŭlajecca napisać zajavu ŭ padatkovuju z prośbaj dazvolić handlavać 60 dzion na hod biez anijakaj rehistracyi. Pryčym treba budzie płacić na karyść dziaržavy štomiesiac 35 jeŭra:
«Treba pryjści ŭ padatkovuju, zarehistravacca ŭ jakaści pradprymalnika ci na hod možna handlavać 60 dzion biez rehistracyi ŭ jakaści pradprymalnika. Nieabchodna budzie płacić fiksavany padatak pamieram kala 35 jeŭra.»
U hetym vypadku handlavać možna budzie tolki 5 dzion na miesiac. Takim čynam, kali babulka ź siemkami vyrašyć choć niejak uzakonić svaje adnosiny ź dziaržavaj, joj pryjdziecca pradać za dzień 42 šklanki siemak. I heta tolki dla taho, kab «adbić» hrošy za rehistracyju, nie zhadvajučy vydatki na sami siemki. Naŭrad ci takoje mahčyma…
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary