Piraty Karybskaha mora 3: Na ŭskrajku śvietu
Treciaja častka pirataŭ pieraŭzyjšła ŭsie čakańni. Pryhody, jakija varta pabačyć.
Piraty Karybskaha mora 3: Na ŭskrajku śvietu (Pirates of the Caribbean: At Worlds End)
ZŠA, 2007, kalarovy, 168 chv.
Režyser: Hor Verbinski
Roli vykonvajuć: Džoni Dep, Kira Najtli, Arłanda Błum, Džefry Raš, Džonatan Prajs, Čoŭ Jun-Fat, Bił Naji, Tom Hołander, Kit Ryčardz
Žanr: Pryhody
Adznaka: 8,5 (z 10)
 |
Na pirataŭ abvieščana palavańnie. Łord Bekiet, jaki atrymaŭ kantrol nad mistyčnym “Latučym halandcam” źniščaje svabodalubny narod na šybienicach. Uił Terner, Elizabet Sŭon i kapitan Barbosa adpraŭlajucca na kraj śvietu, kab vyzvalić ź piakielnaje pastki Džeka Vierabja (Džoni Dep). Sama ekscentryčny pirat usich časoŭ i narodaŭ kančatkova – (i talenavita!) – źjechaŭ z hłuzdu. Ale jon – adzin ź dzieviaci pirackich baronaŭ. I tolki razam možna abviaścić vajnu Ost-Indzkaj kampanii, u pasłuhačach jakoj ščupalcatvary Dejvid Džonz…
Druhaja častka Karybskich pirataŭ – “Kufar mierćviaka” – vyhladała paŭzaj paśla ŭdałaha startu “Čornaj žamčužyny”. Ale treciaja častka pieraŭzyjšła ŭsie čakańni.
Trochhadzinny dysnejeŭski atrakcyjon zadaje novy standart pryhodnickaha kino – i źmiaščaje ŭsio.
Pirackaja ramantyka, kachańnie, zvyšvidoviščnyja bojki (scena nad marskoj biezdaniu – sapraŭdny kinacud!), mistyka z art-haŭznymi elementami (Džoni Dep i jahonyja kłony), hehi, staražytnyja mity, kaściumnaja drama (mastaki pabudavali sinhapurski horad XVII stahodździa).
Šyzoidnyja kašmary Džoni Depa, jaki addaje kamandy siabie samomu – i siabie samoha zabivaje – upryhožyli by j festyvalny film, ale ŭ karcinie Hora Verbinski samyja składanyja pryjomy kinamovy zrazumiełyja ŭsim i kožnamu. (Na ekranie źjaŭlajecca j pratatyp Džeka Vierabja – rokier-narkuša Kit Ryčardz u roli tatusi Džeka).
Usie hieroi padmanvajuć adzin adnaho, padstaŭlajuć, pierachodziać na supraćlehły bok (što supravadžajecca bojkami j uciokami) – dobraprystojnaje pirackaje kino kančatkova stanovicca samaj čaroŭnaj i zubadrabilnaj varjatniaj, u jakuju nia soramna zvadzić dzietak.
Nad marskoju varonkaj sčapilisia dva karabli, małpa-artyleryst pa navodcy papuhaja viadzie abstreł vorahaŭ, šalnoje viasielle pad zvon miačoŭ, razumnyja kamiani-kraby, ahramadnaja bahinia Kalipsa – i hrateskny piracki Internacyjanał.
Usie na abardaž kinateatraŭ!
Kali kvitkoŭ chopić.
Ciapier čytajuć
Maštabny zboj u troch biełaruskich bankach: z rachunkaŭ źnikajuć hrošy5
Kamientary