Dyryžor numar adzin

20 studzienia 1892 h. u vioscy Šakuny, što ŭ siońniašnim Pružanskim rajonie, naradziŭsia falkłaryst, dyryžor i hramadski dziejač Ryhor Šyrma.

«Heta znakavaja postać u biełaruskim mastactvie. — raskazvaje historyk i litaraturaznaŭca Arsień Lis. — Pieradusim jon padniaŭ płast biełaruskaj narodnaj pieśni, i pakazaŭ jaje va ŭsio krasie. Jahonaja kapeła stvaryła vydatnyja interpretacyi nie tolki biełaruskaj, ale i zamiežnaj kłasiki.

Ryhor Šyrma žyŭ u Zachodniaj Biełarusi i byŭ vydatnym dziejačom nacynalna-vyzvalenčaha ruchu —

jon byŭ sakratarom Hałoŭnaj upravy Tavarystva biełaruskaj škoły, jakaja supraćstajała pałanizacyi.

Kali zabaranili zbornik vieršaŭ Maksima Tanka, dyk vyjaviłasia, što zabarona tyčyłasia nie stolki vieršaŭ, kolki pramovy, napisanaj Ryhoram Šyrmaj — nastolki jana była jaskravaj i aktualnaj dla biełaruskaha hramadstva.

U Savieckim Sajuzie było try vialikija charavyja dyryžory, jakija značna ŭźniali kulturu — Alaksandr Śviečnikaŭ u Maskvie, Hustaŭ Ernesaks u Estonii i Ryhor Šyrma ŭ Biełarusi.

Na pačatku XX st. kultura narodnaj pieśni raźvivałasia razam z adradžeńniem. U toj čas, kali źjaviłasia „Naša Niva“, kudy ludzi dasyłali narodnyja pieśni. Anton Hrynievič vydavaŭ zborniki pieśniaŭ z notami. Heta byŭ uzdym kultury ŭvohule — naprykład, teatr Bujnickaha, jaki vandravaŭ pa krainie, i paśla vystupaŭ jakoha ŭ miastečkach źjaŭlalisia svaje hurtki, dzie ludzi siarod inšaha śpiavali tyja samyja pieśni.

I postać Ryhora Šyrmy biassprečna mahutnaja. Jon mieŭ encykłapiedyčnyja viedy, pierapisvaŭsia z ukrainskimi kampazitarami z Kanady, toje, što jon rabiŭ sam jak kampazitar, — heta byli tvory vielmi vysokaha kłasa. I vielmi kryŭdna, što ciapier jahonaja spadčyna tak mała zapatrabavana. A heta muzyka najvyšejšaha kłasa, i jana zachavałasia nie tolki na płaścinkach. Voś ja słuchaju radyjo biełaruskaje, ale tam ža ŭsio heta nie hučyć, chacia ŭ Fondzie musić być šmat hetych zapisaŭ. I heta vielmi kryŭdna».

U Pružanach u miascovym domie kultury 20 studzienia adbudziecca śviatočny viečar, u jakim voźmuć udzieł navukoŭcy i rodnyja Ryhora Šyrmy. Pačatak 19.00.

24 studzienia ŭ Małoj zale fiłarmonii adbudziecca kancert «Pieśnia — duša naroda» (da 120-hodździa z dnia naradžeńnia Ryhora Šyrmy). U kancercie voźmie ŭdzieł Dziaržaŭnaja akademičnaja charavaja kapeła Respubliki Biełaruś imia R.Šyrmy. Mastacki kiraŭnik — narodnaja artystka Biełarusi Ludmiła Jafimava. Pačatak 19.00

• 0
• 0
• 0
• 0
• 0
• 0
• 0
• 0