Tavarystva achovy pomnikaŭ: vyratujem Zybickuju razam!

Biełaruskaje tavarystva achovy pomnikaŭ historyi i kultury źviartajecca da hramadskaści z zaklikam «Vyratujem Zybickuju razam!»

«Usie, kamu balić za historyka-kulturnuju spadčynu Biełarusi! Davajcie abjadnajemsia i prykładziem supolnyja namahańni, kab vyratavać adzin z unikalnych kutkoŭ histaryčnaha centra Minska — pravy bok vulicy Zybickaj (Handlovaj). Pytańnie ab zabudovie terytoryi paŭstała daŭno. Ni adzin z pradstaŭlenych prajektaŭ nie adpaviadaŭ i nie adpaviadaje zakanadaŭstvu i dziejnym mietodykam u śfiery achovy historyka-kulturnaj spadčyny», — havorycca ŭ zvarocie tavarystva.

Staršynia tavarystva Anton Astapovič padkreśliŭ, što letaś Tavarystvam achovy pomnikaŭ byŭ raspracavany eskizny prajekt rehienieracyi dadzienaj terytoryi, jakim praduhledžanaje adnaŭleńnie stračanych histaryčnaj płanirovačnaj struktury, budynkaŭ i zbudavańniaŭ, histaryčnaha łandšaftu.

«Vysoki prafiesijanalizm daśledčykaŭ i raspracoŭščykaŭ eskiznaj prapanovy HA BDTAPHK byŭ paćvierdžany i sioleta pieramohaj u naminacyi «Restaŭracyja, rekanstrukcyja i adnaŭleńnie abjektaŭ historyka-kulturnaj spadčyny» na mižnarodnym architekturnym konkursie «Leanarda-2011», — padkreśliŭ Astapovič.

Prajekt-pieramožca byŭ uvohule adzinym biełaruskim na «Leanarda», naminacyj ža na konkursie było siem.

Ale niahledziačy na vysokija acenki, prajektnaja prapanova była praihnaravanaja na aficyjnym uzroŭni,

Sa słovaŭ Astapoviča, užo znajšlisia inviestary, — darečy, z Rasii. Takim čynam nad Zybickaj (Handlovaj) navisła pahroza. Faktyčna pačałosia prajektavańnie z boku «Minskprajekta» i «Hramadzianprajekta»; eskiznaja prapanova, jakaja, pavodle Astapoviča, nie adpaviadaje anivodnamu kryteru praviadzieńnia prac na historyka-kulturnych kaštoŭnaściach, u vieraśni ŭzhodnienaja dla dalejšaj pracy Navukova-mietadyčnaj radaj.

«I, jak vynik, nieŭzabavie budzie stračanaja hetaja ci nie apošniaja placoŭka histaryčnaha centra, dzie pracy možna było b vykanać biezdakorna, a vynikam hanaryłasia b usia Biełaruś i jaje hramadzianie», — havoryć staršynia Biełaruskaha tavarystva achovy pomnikaŭ historyi i kultury.

Astapovič ličyć, što zastajecca adziny šaniec — abjadnacca: «Tamu zaklikajem abaranić kavałačak histaryčnaha centra Minska razam. Heta možna zrabić praz hramadskaje abmierkavańnie, jakoje praduhledžana pastanovaj Savieta ministraŭ ad 1 červienia 2011 h. № 687, jakaja pradpisvaje praceduru takich abmierkavańniaŭ, u tym liku prajektaŭ na historyka-kulturnych kaštoŭnaściach, i jakoj zaćvierdžanaje Pałažeńnie ab paradku praviadzieńnia hramadskich abmierkavańniaŭ u halinie architekturnaj, horadabudaŭničaj i budaŭničaj dziejnaści».

Tavarystva prapanuje hramadzianam nakiroŭvać na adras Minharvykankama (220050, pr. Niezaležnaści, 8, h. Minsk) adpaviednyja listy, uzor možna spampavać adsiul.

Tak Tavarystva choča prymusić čynoŭnikaŭ vykanać zakanadaŭstva i pravieści hramadskaje abmierkavańnie pa Zybickaj. Astapovič raźličvaje na toje, što minčuki nie buduć abyjakavymi. Pavodle jahonych źviestak, takija listy ŭžo napisali niekalki viadomych u Biełarusi ludziej, a taksama staršynia Rady BNR Ivonka Surviła.

«Dla nas važnaja maralnaja padtrymka. Kali hramadskaść nie padtrymaje idei praviadzieńnia hramadskaha abmierkavańnia ci padčas takoha abmierkavańnia daduć zhodu na aficyjny prajekt, paŭstanie pytańnie — dla kaho tut pracavać.

Tady zastaniecca tolki skazać: my zasłužyli svoj los», — padkreślivaje Astapovič.

• 0
• 0
• 0
• 0
• 0
• 0
• 0
• 0