Apieratyŭnyja hrupy Minsielhascharču praviarajuć jakaść uborki ŭradžaju

Apieratyŭnyja hrupy Ministerstva sielskaj haspadarki i charčavańnia na čale ź ministram Michaiłam Rusym i jaho namieśnikami praviarajuć chod uborki ŭradžaju i jakaść arhanizacyi rabot u rehijonach.

Pravierki pačalisia ŭ subotu i pradoŭžacca siońnia. Jak paviedamiła napiaredadni vychadnych pres-słužba Minsielhascharču, «členy apieratyŭnaha štaba na miescach praviaduć acenku stanu pasievaŭ sielskahaspadarčych kultur, pracu zbožžaŭboračnych kambajnaŭ i inšaj sielhastechniki i abstalavańnia, jakaść dapracoŭki zbožža na zbožžapryjomnych punktach, hatoŭnaść i stan składskich pamiaškańniaŭ, pracu zbožžasušylnych kompleksaŭ».

Anałahičnaja praktyka, zaznačaje pres-słužba, prymianiałasia padčas pasiaŭnoj kampanii i dakazała svaju efiektyŭnaść: «Takija inśpiekcyi dazvalajuć nie tolki pravieści apieratyŭny analiz situacyi na miescach, ale i pry nieabchodnaści apieratyŭna vyrašyć pytańni, što patrabujuć udziełu kiraŭnictva Minsielhascharču i členaŭ urada».

Paviedamlajecca taksama, što da hetaha času ŭborku zbožžavych i zierniebabovych kultur pačali ŭsie rajony Biełarusi — «užo možna kazać pra start masavaj uborki ŭ krainie».

Na 22 lipienia, pavodle źviestak Minsielhacharču, zbožžavyja i zierniebabovyja kultury (biez uliku kukuruzy na ziernie) ubranyja na płoščy 241 tys. hiektaraŭ, što składaje 9,9% da pasiejanych. Namałočana 747,5 tys. ton zbožža pry siaredniaj uradžajnaści 31,1 c/ha. Azimy raps ubrany na płoščy 171,6 tys. hiektaraŭ, abo 68,9% płoščaŭ, jakija zachavalisia. Namałočana 270 tys. ton rapsu pry siaredniaj uradžajnaści 15,7 c/ha.

Sioleta vałavy zbor zbožža (z ulikam kukuruzy) čakajecca na ŭzroŭni kala 9 młn. ton, paviedamiŭ prem'jer-ministr Michaił Miaśnikovič padčas rabočaj pajezdki ŭ Minski rajon 20 lipienia.

Pavodle jaho acenki, sioleta ŭrad nadaje asablivuju ŭvahu aktyŭnaści ŭboračnych rabot. «Za pracentami, dumaju, hnacca tut nierazumna, tamu što ŭradžaj u pryncypie dobry, i chaciełasia b, kab ziernie naliłosia z ulikam spryjalnych klimatyčnych umoŭ. Kuraniat, jak kažuć, uvosień ličać, ale, u śviranie razam z kukuruzaj budzie kala 9 miljonaŭ ton», — skazaŭ Miaśnikovič.

Kažučy pra hatoŭnaść sielhasarhanizacyj da ŭboračnaj, premjer zaznačyŭ, što pytańni z zabieśpiačeńniem haspadarak palivam, sielhastechnikaj i transpartam dla vyvazu z paloŭ uradžaju «ŭ cełym vyrašanyja». Byli ciažkaści z zakupkami paliva, adnak nieabchodnyja dla ich vyrašeńnia materyjalna-techničnyja resursy adšukanyja, skazaŭ Miaśnikovič.

«Usiaho nam treba zvyš 2,5 trłn.: 680 miljardaŭ było vydzielena raniej, 870 miljardaŭ jašče adšukali dadatkova. Zaraz pytańniaŭ ź finansavańniem zakupak paliva my nie bačym», — zajaviŭ kiraŭnik urada.

• 0
• 0
• 0
• 0
• 0
• 0
• 0
• 0