Saakašvili adpracavaŭ u zombaskryni
Hruzinski lider adpłaciŭ za niepryznańnie Abchazii i Paŭdniovaj Asiecii sumnieŭnaj valutaj.
Zapuskajučy ŭprajm-tajm Saakašvili, tut apryjory davali anučaj pa tvary maskoŭskamu duumviratu. Što i pakazała previentyŭnaja reakcyja vusnami Hryzłova.
Chto b moh padumać, što dystancyjavańnie Biełarusi ad Rasii budzie adbyvacca ŭ takich ekzatyčnych formach — u pryvatnaści z kaŭkazskim akcentam?
Uvohule ž,
intervju z Saakašvili na BT pakinuła dvaistaje ŭražańnie. Z adnaho boku, jon vykryvaŭ impierskija zamaški Rasii, ź inšaha — vystupiŭ u roli adbielvalnika dla tutejšaha načalstva. Najpierš heta tyčycca advakackich pasažaŭ na temu źnikłych.
Takim čynam hruzinski lider, što ŭvieś čas sprabuje znoŭ načyścić da blasku svoj padpsavany imidž demakrata, dadaŭ arhumientaŭ tym, chto upeŭnieny: palityka — apryjory brudnaja reč. Ciapier na sumleńni Saakašvili — rytaryčnaje pytańnie: ci abaviazkova było mienavita takim čynam apłočvać niepryznańnie Minskam miaciežnych hruzinskich pravincyj?
Zrešty, i Realpolitik staroj Jeŭropy daloka nie sterylnaja. U svoj čas Łukašenka pradaŭ Jeŭraźviazu mienavita hetaje niepryznańnie Abchazii z Paŭdniovaj Asiecijaj — i Brusiel zhadziŭsia na padmienu demakratyi hieapalitykaj.
Adnak varta hladzieć hłybiej. Siońnia
vyznačalnaja dla Biełarusi łomka pačynajecca mienavita ŭ hieapalityčnaj (i častkova ŭ ekanamičnaj) płaščyni.
Najchutčej što Łukašenka śviadoma, racyjanalna kidaje vyklik Maskvie pakazalnym bratańniem ź nialubymi joj liderami — raniej ź Juščankam, ciapier — z Saakašvili.
Treba niejak vykaraskvacca z maskoŭskaj pastki, i čym bolej jatrycca Kreml, tym bolej apraŭdanym stanie vyhladać dystancyjavańnie: pahladzicie, maŭlaŭ, na hety vialikadziaržaŭny šał, chiba z takimi kašu zvaryš?!
Ciapier pastka materyjalizujecca najpierš u vyhladzie Mytnaha źviazu. Siońnia na Homielščynie
Łukašenka pačaŭ słać sałomku pad razvał prajekta. Maŭlaŭ, u vypadku jaho niaŭdačy «nie my budziem tamu pryčynaj», bo toj źviaz, jak padajecca, patajemna choča razvalić... sama Rasija. Pytańnie, adnak, u tym, ci ŭdasca «saskočyć» — zaraz chvatka Maskvy jak nikoli ŭčepistaja.
Kamientary