Budanaŭ admoviŭsia ad Załatoha aficerskaha kryža ordena «Za zasłuhi pierad Polščaj»
Kiraŭnik Ofisa prezidenta Ukrainy i kiraŭnik raźviedki zreahavaŭ na pazbaŭleńnie prezidentam Polščy Karalem Naŭrockim Uładzimira Zialenskaha ordena Biełaha Arła — najvyšejšaj uznaharody krainy.
«Na žal, prezident Polščy Karal Naŭrocki ŭčyniŭ niedružalubny akt u dačynieńni da našaha naroda, pazbaviŭšy prezidenta Ukrainy raniej uručanaha jamu ordena Biełaha Arła. Biezumoŭna, heta padarunak dla maskoŭskaha ahresara, jaki toj abaviazkova vykarystaje suprać abiedźviuch našych krain.
Našy narody majuć daŭnija ŭzajemaadnosiny i roznyja staronki historyi — jak hieraičnyja, tak i trahičnyja. Adnak heta pavinna być padstavaj dla hłybokaha asensavańnia, a nie hrubych palityčnych śpiekulacyj. Ukraina nie ŭkazvaje nivodnamu inšamu narodu, jak jamu vyvučać svaju historyju. Tamu i my pakidajem za saboj spraviadlivaje prava na ŭłasnuju nacyjanalnuju pamiać i hodnaść.
Pierakanany, što hety žest prezidenta Polščy nie pra spraviadlivaść i inšaje. Bo pra jakuju spraviadlivaść moža iści havorka, kali ordena Biełaha Arła, naprykład, dahetul nie pazbaŭleny italjanski fašyscki dyktatar i paplečnik Hitlera Bienita Musalini?», — napisaŭ Kirył Budanaŭ u svaim telehram-kanale.
«Ukraina, biez sumnievu, daść acenku hetaj padziei. Ale, niahledziačy ni na što, my i nadalej budziem mocna stajać na pryncypach adkrytaha partniorstva z usimi našymi sajuźnikami. Adnak partniorstva raŭnapraŭnaha, zasnavanaha na pryncypach uzajemapavahi. Ukraina praciahnie zmahacca ŭ avanhardzie abarony ŭsioj Jeŭropy, u tym liku Polščy, płaciačy najdaražejšuju canu. Ale, jak i luby ŭkrainiec, ja nie mahu zastavacca ŭbaku i prosta nazirać za tym, jak suprać našych hramadzian biespadstaŭna i štučna raskručvajecca machavik nianaviści.
Z ulikam hetaha ja admaŭlajusia ad Załatoha aficerskaha kryža ordena «Za zasłuhi pierad Polščaj», jakim mianie ŭznaharodziŭ letaś prezident Polščy.
Upeŭnieny, što ŭkrainskaje hramadstva — i vajskoŭcy, i cyvilnyja — adčuvajuć takija ž emocyi i padtrymajuć hety krok», — napisaŭ jon.
Učora stała viadoma, što Karal Naŭrocki pazbaviŭ Zialenskaha najvyšejšaj uznaharody Polščy ordena Biełaha Arła.
Pryčynaj stała rašeńnie Zialenskaha prysvoić adnamu z padraździaleńniaŭ Sił śpiecyjalnych apieracyj Ukrainy nazvu «imia Hierojaŭ UPA».
Zialenski atrymaŭ orden u krasaviku 2023 hoda z ruk Andžeja Dudy. Tady hety krok nazyvali simvałam histaryčnaha zbližeńnia dvuch narodaŭ, a ŭznaharodu prysudzili za vybitnyja zasłuhi ŭ pahłybleńni adnosin i supracoŭnictva ŭ śfiery biaśpieki.».
U Polščy, dzie baluča staviacca da pamiaci pra Vałynskuju trahiedyju Druhoj suśvietnaj vajny, heta vyklikała chvalu abureńnia.
Paśla rašeńnia Naŭrockaha kiraŭnik MZS Ukrainy Andrej Sibiha zajaviŭ, što admoviŭsia ad Kamandorskaha kryža z zorkaj Ordena «Za zasłuhi pierad Polščaj» i paabiacaŭ u bližejšy čas aficyjna viarnuć uznaharodu polskamu boku.
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?49
Kamientary