Łukašenka: Tam, dzie ź dziacinstva pryciahvajuć da pracy, dohladu žyvioły mienš prablem z pjanstvam

U Biełarusi nieabchodna raspracavać prahramu pa padtrymcy i raźvićci asabistych padsobnych haspadarak da 2015 hoda, zrabiŭšy jaje zrazumiełaj i dastupnaj. Pra heta zajaviŭ Alaksandr Łukašenka 18 maja na naradzie pa pytańniach raźvićcia asabistych padsobnych haspadarak hramadzian, paviedamiła pres‑słužba prezidenta.

Pytańnie raźvićcia asabistych padsobnych haspadarak «nieadnarazova ŭźnimałasia prezidentam». Upieršyniu jano było razhledžana ŭ 2000 hodzie. Raźvićcio sialanskich (fiermierskich) i asabistych padsobnych haspadarak uvajšło asobnym kirunkam u Dziaržaŭnuju prahramu adradžeńnia i raźvićcia vioski na 2005—2010 hady.

Adnak, «niahledziačy na ŭsie pryniatyja miery, stanovišča spraŭ u hetym siektary ekanomiki stabilna paharšałasia». Heta katehoryja haspadarak «ihraje značnuju rolu ŭ zabieśpiačeńni charčovaj biaśpieki krainy, zaniataści nasielnictva, słužyć dadatkovaj krynicaj dachodaŭ sielskich žycharoŭ».

Vykarystoŭvajučy krychu bolš jak 11% sielskahaspadarčych ziamiel, hramadzianie ŭ asabistych padsobnych haspadarkach vyrablajuć kala 30% vałavoj pradukcyi sielskaj haspadarki.

U hetych haspadarkach vyroščvajucca najbolš pracajomkija kultury — bulba (88% ahulnaha zboru), aharodnina (80%), płady i jahady (bolš za 90%).

Kolkaść asabistych padsobnych haspadarak hramadzian, jakija pastajanna žyvuć u sielskaj miascovaści, niaŭchilna pamianšajecca: u paraŭnańni z 2000 hodam ich stała mienš na 175 tys., abo na 14%. Heta tendencyja charakternaja dla ŭsich abłaściej.

Na dumku Łukašenki, takija haspadarki vykonvajuć i važnuju vychavaŭčuju funkcyju: «Žyćcio pakazvaje: tam, dzie ź dziacinstva pryciahvajuć da pracy, dohladu žyvioły i aharodnictva, tam mienš prablem z pjanstvam i inšymi niehatyŭnymi źjavami».

Łukašenka ličyć, što nielha na 100% pahadzicca ź mierkavańniem, što abjektyŭnymi pryčynami spadu źjaŭlajucca skaračeńnie kolkaści sielskich žycharoŭ, stareńnie sialan, niežadańnie moładzi abzavodzicca padsobnaj haspadarkaj.

«Sprava nie stolki ŭ abjektyŭnych pryčynach, kolki ŭ abyjakavym, dakładniej, u niadbajnym staŭleńni ŭ pieršuju čarhu z boku miascovych uład da kłopataŭ ludziej, jakija viaduć padsobnyja haspadarki, — skazaŭ Łukašenka. — Praktyčna ŭsio kinuta na samaciok, maŭlaŭ, vyžyvuć — dyk vyžyvuć, a nie — dyk nie, za pryvatnikaŭ, zdajecca, my nie ŭ adkazie. Tak nikudy nie varta».

Jon pahadziŭsia ź nieabchodnaściu raspracoŭki prahramy pa padtrymcy i raźvićci asabistych padsobnych haspadarak da 2015 hoda. Adnak, padkreśliŭ Łukašenka, «heta pavinna być vielmi zrazumiełaja, dastupnaja i karotkaja prahrama, dzie budzie vyznačana jašče raz, što takoje asabistaja padsobnaja haspadarka, jakija lhoty, pryvilei i padtrymka, ale ni ŭ jakim razie nie ŭtrymanstva». U dakumiencie taksama buduć vyznačany adkaznyja za jaje realizacyju: kiraŭniki haspadarki, sielsavieta i rajvykankama.

• 0
• 0
• 0
• 0
• 0
• 0
• 0
• 0