U centry Hrodna budujuć novy kvartał. Ale zamiest sučasnaj architektury — zvyčajnyja panelki, jak u spalnikach
Haradžanie nie ŭ zachapleńni ad źjaŭleńnia šarahovych panelek u centry.
Panelki ŭ samym centry
Novy kvartał budujecca ŭ niepasrednaj blizkaści da histaryčnaha centra Hrodna, dzie ŭžo praktyčna niama volnaha miesca dla zabudovy. Raniej tam znachodzilisia haražy i składy.
Zabudova budzie składacca z šaści šmatpaviarchovikaŭ vyšynioj ad 6 da 10 pavierchaŭ, u jakich budzie 570 kvater. Zabudoŭščyk — «Hrodnažyłbud», jaki viadomy budaŭnictvam adnastajnych panelek.
Z ulikam vydatnaj łakacyi kvatery byli chutka raspradadzieny pa cenach ad 2750 da 3000 rubloŭ za kvadrat (kala $900—$1000).
Heta samyja darahija kvatery ad «Hrodnažyłbuda», jakija sioleta byli ŭ prodažy. U addalenym ad centra mikrarajonie Hrandzičy kvadrat u toj ža čas kaštavaŭ ad 2070 da 2550 rubloŭ. U Viasieńnim, što znachodzicca pobač ź lesaparkam «Pyški» i Niomanam, kvadrat byŭ pa 2600—2700 rubloŭ.
Toj fakt, što ŭ samym centry Hrodna budujuć kvartał z banalnymi panelkami, padabajecca nie ŭsim.
«Čarhovaja žyłbudaŭskaja panelka ŭ kolerach viasiołki. Najmicie, kali łaska, sučasnaha dyzajniera. Cichi žach», —
napisaŭ adzin z karystalnikaŭ pad dopisam u akaŭncie NewGrodno ŭ instahramie.
«Prajekt hetaha žylla stvorany ŭ 90‑ia hady minułaha stahodździa!!! Takija damy ŭ spalnych rajonach vyhladajuć žachlivieńka. Dla centra horada možna i bolš sučasnaje budavać žyllo», — dadaje inšy.
«I hetym zabudoŭvajuć centr horada… Boža, schadzicie ŭ hości da zabudoŭščyka, jaki ŭźvioŭ dom na Citova, 14. Pahladzicie, jak možna budavać», — aburajecca jašče adzin kamientatar.
Dom na Citova, 14 — sučasny siamipaviarchovy manalitny dom na 56 kvater. Viasnoj 2020 hoda na etapie budaŭnictva kvadrat u im pradavaŭsia za $980—$990. Takaja cana była amal u dva razy vyšejšaja za mietr u šarahovych novabudoŭlach. Tym nie mienš usie kvatery, uklučajučy šeść šykoŭnych dvuchpaviarchovych pientchausaŭ, byli raspradadzieny jašče da zaviaršeńnia budaŭnictva.
Ciapier u hetym domie niechta pradaje kvateru biez ramontu za $129 tysiač, što składaje $1585 za mietr.
Ale kali ŭ vypadku z domam na Citova razmova idzie pra elitnuju nieruchomaść u centry, to novy kvartał — heta panelki, jakija asabliva ničym nie adroźnivajucca ad tych, što ŭzvodzić «Hrodnažyłbud» na ŭskranach horada.
«Ludzi va ŭładzie žyvuć zhodna z savieckimi standartami»
Hrodzienski krajaznaŭca Miečysłaŭ Jan Supron, jaki šmat hadoŭ zmahajecca za zachavańnie historyka-kulturnaj spadčyny Hrodna, nazyvaje takuju zabudovu ŭ centry žachlivaj.
«Ludzi va ŭładzie žyvuć zhodna z savieckimi standartami. Kožnaje savieckaje pakaleńnie niešta sapsavała ŭ horadzie. Byli chruščoŭki, potym brežnieŭki… I kali ŭ krainach Uschodniaj Jeŭropy paśla razvału SSSR pierajšli da budaŭnictva ŭ jeŭrapiejskim styli i panelki pierastali być modnymi, to ŭ Biełarusi zachavałasia savieckaja tradycyja budaŭnictva.
Ciapier, kali niepadalok ad centra budujuć panelnyja dziesiacipaviarchoviki i pišuć, što heta budzie žyllo z vyniasieńniem aŭtamabilaŭ za miežy kvartała, to mnie prosta niezrazumieła, jak možna budavać sučasnaje žyllo biez padziemnaha parkinhu».
Krajaznaŭca kaža, što ŭ centry mała miesca, ziamla daražejšaja, tamu ŭ centralnaj častcy haradoŭ zvyčajna budujuć bolš darahoje žyllo. A ŭ našym vypadku ŭzvodziać šarahovyja vysotki biez mahčymaści narmalna zaparkavać mašynu.
Historyk aburajecca adnatypnymi šmatpaviarchovikami, jakija ŭzvodzić u centry horada «Žyłbud».
«Raniejšyja krajavidy sapsavanyja. Hladziš na histaryčny centr i bačyš, jak z-za kaściołaŭ paŭsiul tyrčać tyja śviečki. U miascovych uładaŭ niama nijakaj kancepcyi i nijakaha razumieńnia, jak treba zabudoŭvać prastoru pobač z centram», — adznačaje Supron.
Adnoj z pryčyn, čamu ŭ tym liku architektary nie prydumlajuć ničoha cikavaha, historyk nazyvaje navučańnie pa savieckich standartach.
«Architektary vučacca pa savieckich padručnikach, jany zachraśli ŭ toj eposie, tamu i budujuć adpaviedna. U Minsku situacyja krychu lepšaja, a toje, što ciapier budujuć u abłasnych haradach, heta architektura 1980-ch».
Surazmoŭca adznačaje, što ciapier u Jeŭropie isnuje trend na budaŭnictva troch-piacipaviarchovych damoŭ z padziemnym parkinham i zialonymi zonami.
U Biełarusi ž amal paŭsiul budujuć typovyja šmatpaviarchovyja damy, i adnoj z prablem Hrodna možna nazvać, što takija spalnyja kvartały ŭsio bližej padbirajucca da centra horada.
Ciapier čytajuć
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy135135
Kamientary