U Francyi zatrymali padazravanych u padrychtoŭcy zamachu na zasnavalnika Gulagu.net
Supracoŭniki Hałoŭnaha ŭpraŭleńnia ŭnutranaj biaśpieki MUS Francyi zatrymali ŭ minuły paniadziełak čatyroch mužčyn va ŭzroście ad 26 da 38 hadoŭ, padazravanych u padrychtoŭcy zamachu na zasnavalnika pravaabarončaha prajekta Gulagu.net Uładzimira Asiečkina.
Pieršapačatkova paviedamlali, što metaj zamachu byŭ «rasijski apazicyjanier», jaki pražyvaje ŭ horadzie Bijaryc, piša Bi-bi-si.
Hazieta Parisien nazyvała imia Asiečkina, adnak žurnalistam Figaro ŭłady hetuju infarmacyju kamientavać admovilisia.
Jak pisała Figaro sa spasyłkaj na Nacyjanalnuju antyterarystyčnuju prakuraturu (PNAT), zamach byŭ praduchileny ŭ apošni momant.
Sam Uładzimir Asiečkin paźniej paćvierdziŭ infarmacyju francuzskich ŚMI ahienctvu AFP i ŭ svaim telehram-kanale.
«Tak, paćviardžaju. Ja žyvy, niahodniki zatrymanyja, — napisaŭ jon, padziakavaŭšy francuzskim uładam. — Kali b nie ich śpiecyjalisty i aficery, mianie b užo nie było ŭ žyvych».
Rasśledavańnie było pačata 19 vieraśnia paśla atrymańnia śpiecsłužbami sihnału ab mahčymaj zmovie z metaj zabojstva Asiečkina.
Parisien piša, što padazravanych, jakija majuć francuzskaje i rasijskaje hramadzianstva (try ź ich — vychadcy z Dahiestana), zatrymali ŭ paryžskim rehijonie i ŭ departamiencie Atłantyčnaja Łuara. Na ich telefonach vyjavili videazapisy z kadrami sačeńnia za domam Asiečkina.
Pavodle źviestak krynicy AFP, videa było źniata ŭ krasaviku, kali troje padazravanych adpravilisia ŭ Bijaryc. Adzin z zatrymanych śćviardžaŭ, što ŭsie jany byli tam u adpačynku, adnak u pakazańniach mužčyn byli razychodžańni, paviedamiła krynica ahienctva.
Prajekt Gulagu.net byŭ stvorany ŭ 2011 hodzie i raspaviadaŭ pra katavańni i karupcyju ŭ rasijskaj pienitencyjarnaj sistemie. Asiečkin žyvie ŭ Francyi z 2015 hoda.
U 2022 hodzie Asiečkin kazaŭ, što jaho sprabavali zastrelić u domie ŭ Bijarycy, dzie jon pražyvaje ź siamjoj. Tady francuzskija ŭłady pačali rasśledavańnie, ale nie vyjavili «nijakich abjektyŭnych dokazaŭ», jakija paćviardžajuć śćviardžeńnie ab tym, što chtości sprabavaŭ jaho zabić.
Za hod da hetaha prajekt Gulagu.net paviedamiŭ, što ŭ jaho rasparadžeńni apynuŭsia vialiki archiŭ ź videazapisami katavańniaŭ źniavolenych, i apublikavaŭ častku ź ich. Publikacyja vyklikała vialiki hramadski rezanans.
U Rasii ŭ dačynieńni da Asiečkina było zaviedziena niekalki kryminalnych spraŭ, u tym liku ab vajennych «fejkach». Rasijskija ŭłady taksama abviaścili jaho «inaahientam».
Šrajbman z kalehami prapanavali pakrokavy płan deeskałacyi adnosin Biełarusi i ES53
Kamientary
Jany pomściać tym, kamu nie padabajecca "HUŁAH".