U mieniu novaha minskaha restarana jość miedavik z žytnim marozivam i draniki z tar-taram z alenia i vyrazkaj.
Niadaŭna ŭ Minsku adkryŭsia restaran nietradycyjnaj biełaruskaj kuchni «Mary». Jon znachodzicca ŭ modnym dvoryku ŭ Rakaŭskim pradmieści i pakul pracuje ŭ testavym režymie.
Što pa cenach? Zakuski tam kaštujuć ad 10 da 25 rubloŭ, haračyja stravy — pa 60.
U restaranie vysokija stoli i minimalistyčny interjer u šerych adcieńniach, na stałach — bukieciki z ramonkaŭ, kala kanap ikiebany z pšaničnych kałasoŭ.
Błohier Kakabaj raskazvaje pra mieniu.
Jon zamoviŭ śviežy žytni chleb z chrumstkaj skarynačkaj i roznymi namazkami z papryki i smalca za 10 rubloŭ, husty chaładnik z bulbaj za 20 rubloŭ.
«Porcyja abaviazanaja być razy ŭ dva bolšaj, sens ekanomić na kiefiry, vypuskajučy hościa hałodnym?» — piša błohier.
Sałat «Cezar» na kurynym šnicali ŭ sousie sa šprot kaštuje 27 rubloŭ. Kakabaj adznačaje, što recept nahadvaje chipstarskaje bistro «Insejn».
Viehietaryjanski biešbarmak — heta narezanaje ciesta ź biełymi hrybami i lisičkami ŭ śmietankovym sousie z syrnym musam. Padajuć za 35 rubloŭ.
«Smačna, cikava, sumlenna pa porcyi, pa-našamu — prydatna!» — kamientuje Kakabaj.
Kuryny šnical sa smažanym jajkam i ahurkami ŭ śmiatanie z vałoškami kaštuje 35 rubloŭ. Vyrazka z asmalenaj bulbaj i sousam — 60.
«U pražarku medium rare nie trapili, ale vyrazka akazałasia jakasnaj, režacca nažom dla masła, što kaža ab dobrym žyćci karovy», — aceńvaje błohier.
U mieniu taksama bulba z marozivam z travami, kačka kanfi z morkvaj, stronha na vuhlach, kapytki ź biełymi hrybami.
Na desiert tut jość šoka-fandan pa-Baradzinsku z kalandraj i marozivam ź biełych hryboŭ i miedavik z žytnim marozivam. Apošni, jak piša błohier, u najlepšych tradycyjach dalikatnaha «Kavałačka ščaścia» — viadomaha minčukam miedavika.
U mieniu taksama jość kaljan.
Pakul restaran pracuje ŭ testavym režymie, to na mieniu dziejničaje źnižka 20%.
«Kali ścierci z pamiaci nietradycyjnuju biełaruskuju kuchniu, to hatavać jeŭrapiejskuju kłasiku ŭmiejuć. Pahladzim, jaki šlach jany vybieruć dalej, a da testu ŭsialak rekamienduju», — napisaŭ vodhuk błohier.
Kakabaj padzialiŭsia taksama svaimi favarytami siarod restaranaŭ sučasnaj biełaruskaj kuchni — «Bulbašy» i «Litviny».
Kamientary