Staŭka refinansavańnia ŭ Biełarusi ŭžo dva hady zastajecca na ŭzroŭni 9,5%. Staršynia Nacbanka Raman Hałoŭčanka ŭ intervju sb.by raspavioŭ, čamu biełaruski rehulatar nie źmianiaje staŭku refinansavańnia.
Pavodle słoŭ kiraŭnika Nacbanka, staŭka refinansavańnia — adzin ź instrumientaŭ hrašova-kredytnaj palityki. Rašeńnie ž ab jaje ŭzroŭni prymajecca zychodziačy ź biahučaj ekanamičnaj situacyi i pierš za ŭsio ŭzroŭniu inflacyi.
U pačatku červienia Bank Rasii ŭpieršyniu z kastryčnika 2023 hoda źniziŭ klučavuju staŭku na 100 bazisnych punktaŭ — da 20% hadavych. Pavodle słoŭ Ramana Hałoŭčanki, hetaje rašeńnie tłumačycca vysokimi tempami rostu spažyvieckich cen u Rasii — kala 10%, što ŭ dva z pałovaj razy vyšej za metu rasijskaha Centrabanka ŭ 4%.
U Biełarusi ž situacyja inšaja: nižej uzrovień inflacyi i bližej da svajho metavaha značeńnia ŭ 5%.
Pavodle acenak Ramana Hałoŭčanki, temp rostu spažyvieckich cen u krainie vyšejšy, ale heta nie krytyčna: «Va ŭmovach zapavoleńnia ekanamičnaha rostu i paskareńnia inflacyjnych pracesaŭ u našych asnoŭnych handlovych partnioraŭ heta dapuščalna. Pa sutnaści, heta kampramis na karyść dziełavoj aktyŭnaści i ekanamičnaha raźvićcia našaj krainy. Inflacyja zastajecca pad kantrolem. Staŭka refinansavańnia roŭnaja 9,5%, što vyšej za inflacyju i harantuje stanoŭčuju realnuju vartaść hrošaj».
U studzieni 2025 hoda pisałasia, što ŭ Biełarusi nie vyklučajuć źnižeńnia staŭki refinansavańnia. Heta adbudziecca pry adsutnaści ryzykaŭ dla cenavaj i finansavaj stabilnaści.
Prahnazavałasia, što staŭka ŭ siarednim za 2025 hod moža skłaścisia na ŭzroŭni 9—9,3% hadavych.
Zaraz staŭka refinansavańnia ŭ Biełarusi znachodzicca na ŭzroŭni 9,5% z červienia 2023 hoda. Da hetaha jaje źnižali šeść razoŭ zapar. Tady ŭ Nacbanku patłumačyli svajo rašeńnie zapavoleńniem inflacyi ŭ krainie.
Kamientary