Zialenski nazvaŭ rasijan «idyjotami» za prapanovu prypynić ahoń na 2-3 dni
Prezident Ukrainy Uładzimir Zialenski na admysłova praviedzienaj praz Zoom pres-kanfierencyi prakamientavaŭ vyniki siońniašnich pieramoŭ ukrainskaj i rasijskaj delehacyi. U pryvatnaści, jon vykazaŭsia pra prapanovu Maskvy ab pieramirji na 2-3 dni dla taho, kab sabrać cieły zahinułych sałdat.
«Jany hatovyja na spynieńnie na 2-3 dni, kab zabirać zabitych z pola boju. Ja liču — idyjoty, tamu što, u pryncypie, spynieńnie ahniu treba dla taho, kab nie było zabitych», — zajaviŭ Zialenski.
Jon taksama skazaŭ, što ŭ budučyni ŭsio ž taki budzie prapracoŭvacca sustreča pamiž Rasijaj i Ukrainaj na ŭzroŭni lidaraŭ krain:
«Što tyčycca sustrečy lidaraŭ, mnie skazaŭ Umieraŭ, što jany ličać, što nad hetym možna pracavać u kancy hetaha miesiaca — pačatku nastupnaha».
Taksama Zialenski padtrymaŭ prapanovu prezidenta Turcyi Redžepa Taipa Erdahana ab mahčymaj arhanizacyi sustrečy čatyroch prezidentaŭ:
«Ja mieŭ razmovu z prezidentam Turcyi Erdahanam. I sapraŭdy, ad jaho byŭ sihnał, jak ja staŭlusia, kali budzie sustreča čatyroch lidaraŭ — jon, prezident Amieryki, Pucin i ja. Ja jamu skazaŭ, što sustreču na ŭzroŭni lidaraŭ ja padtrymlivaju, tamu što ŭ mianie ŭražańnie, što spynieńnia ahniu biez našaj sustrečy nie budzie».
Pry hetym jon adznačyŭ, što ZŠA i ES pačali ŭzhadniać novy pakiet sankcyj suprać Rasii.
«Moža, treba jašče paru niejkich zachadaŭ, i rasijanie pasprabujuć pavodzić siabie jak ludzi».
Ciapier ža praz rasijskija masiravanyja ataki va Ukrainie ŭźnik deficyt hazu na davoli vialikuju sumu:
«U nas jość deficyt, ja nie chaču ciapier kazać vam na jakuju sumu, na dastatkova vialikuju sumu. My pieražyvajem heta praz toje, što byli masiravanyja ataki pa hazaschoviščach, a taksama pa infrastruktury zdabyčy hazu. I heta było z vosieni minułaha hoda», — skazaŭ Zialenski.
Pavodle jaho słoŭ, Ukraina abmiarkoŭvaje ździełku na pastaŭku hazu z Narviehii na $1 młrd.
Zialenski paćvierdziŭ płany chutkaha novaha vialikaha abmienu pałonnymi. Pavodle jaho słoŭ, abmien płanujecca pa formule «1000 na 1000», ale mahčymy taksama dadatkovy «200 na 200», pakolki Ukraina padniała pytańnie adnosna inšych vajskoŭcaŭ, palitviaźniaŭ i žurnalistaŭ.
«Asobna śpisami my abmianiajemsia z rasijanami na hetym tydni. Taksama budzie vieryfikacyja — spadziajemsia, što hetym razam jany pieradaduć śpisy zahadzia», — dadaŭ prezident Ukrainy.
Kamientary
Poddierživaju.