Zialenski spadziajecca, što ZŠA nie sastupiać patrabavańniam Rasii ab źniaćci sankcyj

Maskva zajaviła, što pieramirje ŭ Čornym mory, jakoje pavinna zabiaśpiečyć biaśpieku sudnachodstva, ustupić u siłu tolki paśla admieny zachodnich abmiežavańniaŭ na handal praduktami charčavańnia i ŭhnajeńniami z Rasii.

Zialenski, jaki znachodzicca ź vizitam u Paryžy dla ŭdziełu ŭ samicie kaalicyi na padtrymku Ukrainy, u sieradu ŭviečary daŭ kamientar žurnalistam.

Adkazvajučy na pytańnie, ci zmohuć ZŠA supraćstajać patrabavańniam Maskvy, jon skazaŭ: «Ja spadziajusia na heta. Daj boh, zmohuć. Ale pahladzim».

Bieły dom zajaviŭ u aŭtorak, što rasijskaja i ŭkrainskaja delehacyi damovilisia ab spynieńni ahniu ŭ Čornym mory paśla troch dzion pieramovaŭ z amierykanskimi čynoŭnikami ŭ Saudaŭskaj Aravii.

Adnak praź niekalki hadzin Kreml apublikavaŭ ułasnuju zajavu, dzie byŭ pieraličany šerah umovaŭ. Siarod patrabavańniaŭ Maskvy — admiena zachodnich sankcyj u dačynieńni da finansavych ustanovaŭ, što zajmajucca handlem sielskahaspadarčaj pradukcyjaj, i adnaŭleńnie ich dostupu da mižnarodnaj płaciežnaj sistemy SWIFT.

Prezident ZŠA Donald Tramp paviedamiŭ, što ŭ Vašynhtonie razhladajuć zapyt Maskvy na admienu abmiežavańniaŭ, tady jak u Jeŭrasajuzie zajaŭlajuć, što kazać pra heta jašče rana.

«My nie źbirajemsia skasoŭvać sankcyi, tamu pakul što zanadta rana. U vyniku ŭsio zaležyć vyklučna ad vybaru Rasii na karyść ahresii — ci na karyść vykanańnia mižnarodnaha prava», — zajaviŭ prezident Francyi Emanuel Makron paśla pieramovaŭ ź Zialenskim u Paryžy.

Makron abvinavaciŭ Rasiju ŭ tym, što jana vystaŭlaje ŭsio novyja ŭmovy i nie reahuje na prapanovy ab spynieńni ahniu. Vystupajučy pierad žurnalistami ŭ Paryžy, Zialenski adznačyŭ, što vielmi ŭdziačny abiedźvium partyjam ZŠA za padtrymku, ale vykazaŭ zakłapočanaść tym, što niekatoryja amierykanskija čynoŭniki mohuć znachodzicca pad upłyvam rasijskich naratyvaŭ.

«My nie možam pahadzicca z hetymi naracyjami», — skazaŭ jon.

Adkazvajučy na pytańnie pra toje, z kim u prezidenta ZŠA Donalda Trampa bolš blizkija adnosiny — ź im ci z prezidentam Rasii Uładzimiram Pucinym, Zialenski skazaŭ, što nie viedaje.

«Ja nie viedaju, jakija ŭ jaho sapraŭdnyja stasunki, nie viedaju, kolki ŭ ich [u Trampa z Pucinym] było razmoŭ. U mianie nie nastolki blizkija adnosiny z Trampam, kab razumieć, nakolki blizkija jany z Pucinym», — dadaŭ ukrainski prezident.

• 1
• 0
• 0
• 0
• 0
• 0
• 0
• 0