USU arhanizavana adstupajuć z Kurskaj vobłaści. Rasijanie zaniali Sudžu
Adychod ukraincaŭ z Sudžy daje mahčymaść Pucinu pahadzicca na spynieńnie ahniu, nie hublajučy tvaru.
Rasijskija vajskoŭcy zdymajucca na centralnaj płoščy Sudžy. Kala znaku horada viaduć repartaž prapahandysty. Vyhladaje, USU całkam pakinuli horad. Značyć siońnia jany kančatkova vyjduć z Kurskaj vobłaści. Samaja niečakanaja apieracyja hetaj vajny, jakaja pačałasia siem miesiacaŭ tamu, zaviaršajecca.
Rasijski vajskovy telehram-kanał «Archanhieł śpiecnaza» apublikavaŭ kadry, dzie ludzi ŭ kamuflažnaj formie trymajuć ściahi. Zdymak zrobleny na płoščy kala budynka haradskoj administracyi Sudžy, śviedčyć analiz «Ahientstva».
Vajskovy analityk Jan Maćviejeŭ ličyć, kadry śviedčać pra toje, što USU pakidajuć Sudžu. «Padobna na toje, USU całkam pakinuli horad. Značyć, siońnia jany kančatkova vyjduć z Kurskaj vobłaści», — robić vysnovu Maćviejeŭ. «Taksama jasna, što ŭkraincy zachavali asnoŭnyja siły i nie dapuścili razhromu na Kurskim płacdarmie», — dadaje jon.
Častka ŭkrainskich bryhad, u tym liku samyja bajazdolnyja, vyjšła z Kurskaj vobłaści, piša Forbes.
Zachodniaja častka Sudžy, pavodle apošnich abnaŭleńniaŭ na kartach amierykanskaha Instytuta vyvučeńnia vajny (ISW) i ŭkrainskaha DeepState, znachodzicca pad kantrolem USU. Uschodniaja častka horada, pa dadzienych DeepState, z učorašniaha dnia znachodzicca ŭ šeraj zonie.
Ab pačatku masiravanaha nastupu rasijskaj armii ŭ Kurskaj vobłaści rasijskija vajennyja błohi paviedamili ŭ piatnicu. Hetamu papiaredničaŭ pierachod rasijskaj armii praź miažu ŭ rajonie Śvierdlikava i chutkaje prasoŭvańnie da miažy z boku Kuryłaŭki. Takim čynam, była stvorana pahroza akružeńnia hrupoŭki USU.
Usiaho ŭ Kurskaj vobłaści (na dvuch vystupach) pa stanie na 15 hadzin aŭtorka USU kantralavali 209 kv. km, śviedčać dadzienyja DeepState. Heta amal u dva razy mienš, čym 2 sakavika — 407 kv. km, piša «Ahientstvo».
Ciapier čytajuć
Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana2
Kamientary