U pałon da ŭkraincaŭ trapiŭ 33-hadovy narkaman ź Viciebska, jakoha na froncie vykarystoŭvali jak «adkryvačku»
Videa z Andrejem Łapatniovym vyjšła na kanale Butusov Plus. My daviedalisia pra biełarusa bolš.
Andreju Łapatniovu 33 hady. Pa źviestkach Digital Intelligence Team, jon sapraŭdy biełarus, naradziŭsia i ŭsio žyćcio pražyŭ u Viciebsku. Na ŭkrainskim videa jon kaža, što vučyŭsia ŭ Viciebskim dziaržaŭnym technałahičnym univiersitecie, ale z bazaŭ «Kibierpartyzanaŭ» viadoma tolki, što Łapatnioŭ skončyŭ Viciebski dziaržaŭny kaledž lohkaj pramysłovaści i technałohijaŭ.
U jaho dźvie małyja dački, ale z žonkaj jon u razvodzie.
Łapatnioŭ źmianiŭ vielmi šmat miescaŭ pracy — jon pracavaŭ u budaŭničych firmach, piakarniach, zavodzie «Marka», pładovaaharodninnym kambinacie i inšych firmach. Pa stanie na 2023 hod viciebčuk pracavaŭ u budaŭničaj firmie. Na jaho numar zarehistravany aktyŭny akaŭnt u anłajn-kazino.
Łapatnioŭ mieŭ prablemy z zakonam. U jaho bolš za dziasiatak administratyvak za pjanki. Taksama jaho čatyry razy sudzili — za ŭžyvańnie narkotykaŭ pa č. 1 art. 328 i za parušeńnie režymu. Z 2017 pa 2019 hady jon pravioŭ u kałonii №12 dla recydyvistaŭ u Oršy.
Na videa Łapatnioŭ kaža, što źbiraŭsia jechać na pracu ŭ Jeŭrasajuz. Ale vyrašyŭ užyć narkotyki, i jaho znoŭ zatrymali. Paśla adpuścili pad padpisku ab niavyjeździe.
U Łapatniova vyśpieŭ płan — nielehalna vyjechać ź Biełarusi praz Rasiju. Jon dajechaŭ da Maskvy, ale 2 krasavika 2024 jaho zatrymali. Palicejskija prapanavali jamu kantrakt na vajnu — maŭlaŭ, tady pakarańnia nie budzie. Pa słovach Łapatniova, jaho padmanuli, paabiacaŭšy, što na vajnu jon nie pajedzie, budzie tyłavikom.
«Chto mnie daść aŭtamat, kali ja narkaman? Dumak pra toje, što budu vajavać, u mianie nie było, što ja budu z aŭtamatam niekudy iści, u niekaha stralać… U mianie zrok minus 3, u kaho ja mahu strelić», — raskazaŭ pałonny biełarus.
U vyniku Łapatnioŭ usio ž pajechaŭ na vajnu, trapiŭ u 123-ju motastrałkovuju bryhadu. Jon paŭtara miesiaca vučyŭsia na palihonie, a paśla paŭtara miesiaca pracavaŭ u štabie.
Jon nie sprabavaŭ źviazacca ź biełaruskimi ŭładami abo svajakami, a taksama padaŭ zajavu na rasijskaje hramadzianstva.
Paśla hetaha jamu dali zadańnie — być «adkryvačkaj». Heta čałaviek, jaki ŭ składzie hrupy idzie napierad i «ŭskryvaje» pazicyi praciŭnika — koštam svajho žyćcia. Tam Łapatnioŭ i trapiŭ u pałon. Ciapier prosić, kab jaho abmianiali i viarnuli ŭ Biełaruś.
«Naša Niva» — bastyjon biełaruščyny
PADTRYMAĆCiapier čytajuć
Na svoj dzień naradžeńnia Zialenski z Naŭrockim, Naŭsiedam i Cichanoŭskaj u Vilni ŭšanuje pamiać Kastusia Kalinoŭskaha3
Kamientary
vodka i niedachop nacyjanalizmu. cikava, ŭładalniki Maskoŭskaj impieryi: ratnebierhi, puciny, kabajevy, kadyravy i h.d maci paštoŭku ŭ RB dasłali ? padziakavali za tutejšaha syna, viernaha słužku emperyi Chana Džučy i Ivana Žachlivaha (jak pisaŭ K. Marks i našy historyki ) ?
BIEŁARUSY / LITVINY / Biełaruś /VKŁ treba 2 nazvy vykarystoŭvać siońnia , jak Uhorcy, Finy, Ałbancy i h.t