Jak telešou dapamahli źnizić kolkaść razvodaŭ u Paŭdniovaj Karei

Jak piša The Wall Street Journal, dvaccać hadoŭ tamu ŭzrovień razvodaŭ u Paŭdniovaj Karei byŭ adnym z samych vysokich u śviecie. Hetaja tendencyja ŭźnikła paśla Azijackaha finansavaha kryzisu ŭ kancy 1990-ch i pryniaćcia važnaha zakanadaŭčaha rašeńnia, jakoje ŭpieršyniu dazvoliła chatnim haspadyniam atrymlivać častku piensii muža pry razvodzie. Prykładna ŭ toj ža čas źjaviłasia pieršaje šou, pryśviečanaje razvodam, — «Kachańnie i vajna», dzie hledačy vyrašali, ci pavinna para rasstacca.

Siońnia situacyja źmianiłasia: užo piać hadoŭ zapar uzrovień razvodaŭ u Karei źnižajecca i ciapier składaje 1,8 na 1000 čałaviek. Dla paraŭnańnia: u Biełarusi hety kaeficyjent udvaja vyšejšy — 3,7. 

Śpiecyjalisty źviartajuć uvahu na vialikuju papularnaść kantentu pra razvody ŭ krainie, dzie sacyjalnyja normy i hramadski cisk časta strymlivajuć ludziej ad pryniaćcia rašeńnia razyścisia. Pakolki hetaja tema ŭsio jašče nie stała całkam adkrytaj dla dyskusij, mienavita praź miedyja ludzi mohuć daviedacca, jak inšyja spraŭlajucca z padobnymi prablemami.

Siarod papularnych šou — «Łahier rozdumaŭ ab razvodzie: Abnaŭleńnie», dzie pary, čyje adnosiny znachodziacca pad pahrozaj, sprabujuć pieraasensavać i adnavić svoj šlub, i «Jak vaš šlub?» — dyskusijnaje tok-šou, pryśviečanaje prablemnym adnosinam. A šou znajomstvaŭ «Kachańnie paśla razvodu» pryciahvaje hledačoŭ słohanam: «Znoŭ adzinokija, znoŭ hatovyja da novych znajomstvaŭ».

Pavialičyć

Hledačy takich šou atrymlivajuć praktyčnyja parady pa vyrašeńni siamiejnych prablem, a taksama mahčymaść naładzić bolš ciesnuju suviaź ź blizkimi.

Adnak niahledziačy na papularnaść u miedyja, tema razvodaŭ u Paŭdniovaj Karei dahetul zastajecca sacyjalna styhmatyzavanaj. Dla taho, kab pakazać, što ludzi, jakija pieražyvajuć siamiejny kryzis, nie adzinokija, jurystka Čchvie Juna (Choi Yuna) u 2018 hodzie stvaryła «komiks pra razvod». Jaje inicyjatyva pryviała da stvareńnia papularnaha sieryjała «Dobry partnior» na Netflix, jaki staŭ adnym ź lidaraŭ prahladaŭ u krainie.

Ciapier u Paŭdniovaj Karei tema razvodaŭ achoplivaje nie tolki tradycyjnyja telešou, ale i novyja farmaty. Naprykład, na płatformie karotkamietražnych videa vyjšaŭ sieryjał «Usio abo ničoha» pra vydumanuju znakamitaść, jakaja razvodzicca.

Praz telešou, błohi i dyskusii ŭ sacsietkach mnohija pačynajuć uśviedamlać, što šlub patrabuje pracy, kampramisaŭ i emacyjanalnaj hnutkaści. Hety infarmacyjny ŭpłyŭ, mahčyma, i staŭ adnoj z pryčyn źmianšeńnia kolkaści razvodaŭ u Paŭdniovaj Karei: pary, zamiest taho kab rasstavacca, sprabujuć znajści rašeńni svaich prablem, natchnionyja vopytam inšych.

Adkrytyja razmovy nie padšturchoŭvajuć da razryvu, a naadvarot, dapamahajuć umacoŭvać adnosiny i šukać šlachi da parazumieńnia.

• 13
• 1
• 0
• 2
• 0
• 0
• 0
• 0