U Maskvie nacyjanalizavali nieruchomaść aliharcha ź biełaruskimi karaniami Alaksieja Chocina
Amal try dziasiatki maskoŭskich handlovych abjektaŭ i biźnies-centraŭ, źviazanych z byłym uładalnikam banka «Juhra» Alaksiejem Chocinym, byli kanfiskavany sudom na karyść dziaržavy. Jak piša «Kommiersant», ahulnaja płošča kanfiskavanaj nieruchomaści pieravyšaje 1,5 młn kv. m.
Ekśpierty rynku nieruchomaści adznačajuć, što mnohija z hetych abjektaŭ davoli staryja i patrabujuć renavacyi. Ale amal usie jany raźmieščany ŭ miescach z dobraj prachodnaściu i transpartnaj dastupnaściu.
Asnoŭnaja kaštoŭnaść hetych abjektaŭ — heta ich raźmiaščeńnie. Niahledziačy na toje, što mnohija ź ich užo majuć svoj viek, tym nie mienš tam jość puł arandataraŭ, jany pracujuć, i hetyja miescy, skažam tak, namolenyja, tudy chodziać ludzi», — prakamientavaŭ vice-prezident maskoŭskaha Sajuza handlovych centraŭ Pavieł Lulin.
Śpiecyjalisty kažuć, što siarod kanfiskavanych abjektaŭ jość šmat cikavych. A samym «łasym kavałkam» ź ich nazyvajuć znakamity «Harbuškin dvor» płoščaj 60 tys. kv. m u prestyžnym rajonie na zachadzie Maskvy.
Mahčyma, niekatoryja ź mienš udałyvych prajektaŭ zakryjuć abo źniasuć. A na ich miescy pabudujuć niešta novaje. Darečy, niadaŭna ŭ Maskvie byli nacyjanalizavanyja takija važnyja abjekty z partfiela Alaksieja Chocina, jak hatel Four Seasons, raźmieščany nasuprać Kramla.
***
Alaksiej Chocin i jaho baćka Juryj doŭhi čas ličylisia adnymi z najbolšych uładalnikaŭ kamiercyjnaj nieruchomaści ŭ Rasii. U 2012 hodzie Alaksiej Chocin taksama staŭ asnoŭnym uładalnikam banka «Juhra».
U dačynieńni da Alaksieja Chocina było zaviedziena niekalki kryminalnych spraŭ ab rastracie na dziasiatki miljardaŭ rasijskich rubloŭ. U sakaviku 2024 hoda pa adnoj z hetych spraŭ Chocina prysudzili da dzieviaci hadoŭ kałonii. U listapadzie jon abjaviŭ ab namiery adpravicca vajavać va Ukrainu.
Kamientary