Paśla padziej 2020 hoda biełarusy pačali aktyŭna źjazdžać z krainy. Druhoj pa papularnaści paśla Polščy stała Litva, ale ŭ apošnija miesiacy kolkaść hramadzian Biełarusi tam skaračajecca.
Minus paŭtary tysiačy ad pačatku hoda
Na piku litoŭski DNŽ (lubych typaŭ) mieli 62 844 hramadzianiny Biełarusi. Tak, pavodle aficyjnych danych ad litoŭskaha departamienta mihracyi, było pa stanie na 1 krasavika 2024 hoda. Da taho času ličba biełarusaŭ u Litvie ź dziejnymi DNŽ pastajanna rasła.
Ciapier kolkaść biełarusaŭ ź litoŭskimi DNŽ skaraciłasia na paŭtary tysiačy čałaviek. Pa stanie na 1 kastryčnika takich było 61 357 čałaviek.
Dla paraŭnańnia, za 2023 hod pryrost skłaŭ krychu bolš za 13 tysiač čałaviek. Pikavym akazaŭsia 2022 hod, kali ŭ Litvie prybaviłasia amal 18 tysiač hramadzian Biełarusi z DNŽ. Za 2021 hod dadałosia 7,6 tysiačy biełarusaŭ.
Pa stanie na 1 studzienia 2021 hoda ŭ Litvie naličvałasia 23 440 hramadzianin Biełarusi ź dziejnymi DNŽ. Atrymlivajecca, što za hety čas ličba biełarusaŭ u Litvie vyrasła pryblizna ŭ 2,6 raza.
Ličba biełarusaŭ z PMŽ raście
Niahledziačy na toje, što ahulnaja kolkaść hramadzian Biełarusi z DNŽ u Litvie pačała skaračacca, praciahvaje raści kolkaść biełarusaŭ z pastajannym dazvołami na žycharstva.
Kali pa stanie na 1 studzienia 2024 hoda takich było 3537 čałaviek, to na 1 kastryčnika — 3707. Pa standartnaj pracedury PMŽ atrymlivajuć praz 5 hadoŭ žyćcia pa časovym dazvole na žycharstva, tamu heta biełarusy, jakija pryjechali ŭ Litvu jašče da 2020 hoda.
Taksama admietna, što ŭ Litvie skaračajecca kolkaść zamiežnikaŭ, jakija lehalizavalisia jak vysokakvalifikavanyja śpiecyjalisty. Kali na pačatku ŭładalnikaŭ DNŽ typu Blue Card było 6256 čałaviek, to na 1 kastryčnika zastałosia 6002 čałavieki. Bolš za 4 tysiačy ź ich — hramadzianie Biełarusi.
Paralelna z hetym raście kolkaść trymalnikaŭ DNŽ, vydadzienych na humanitarnych padstavach — 2496 čałaviek u kastryčniku suprać 1846 na pačatku hoda.
Kamientary