«Ciemra adstupaje, i śviatło padymajecca». Nietańjachu vystupiŭ z pramovaj paśla śmierci lidara CHAMAS
Izrailski premjer Bieńjamin Nietańjachu publična paćvierdziŭ śmierć lidara CHAMAS Jachja Sinvara, hałoŭnaha arhanizatara letašniaha terarystyčnaha ŭvarvańnia ŭ Izrail, i źviarnuŭsia da śvietu z pasłańniem: «Zryniem voś zła razam».
Premjer-ministr Izraila Bieńjamin Nietańjachu vypuściŭ zvarot z nahody śmierci lidara CHAMAS, jaki byŭ zabity izrailskaj armijaj u siektary Haza. Słovy premjera pryvodzić izrailski 12-ty telekanał.
«Hramadzianie Izraila, hod tamu Jachja Sinvar zakančvaŭ padrychtoŭku da raźni, jakaja adbyłasia 7 kastryčnika. Siońnia ja pierad vami, kab paviedamić: Jachja Sinvar likvidavany.
Toj, chto ździejśniŭ samaje žudasnaje złačynstva ŭ historyi našaha naroda z časoŭ Chałakostu, hałoŭny teraryst, jaki zabiŭ tysiaču izrailcian i zachapiŭ sotni našych hramadzian, siońnia byŭ likvidavany našymi hierojami.
Siońnia, jak my i abiacali, my adpomścili jamu. Siońnia zło atrymała mocny ŭdar, ale naša zadača jašče nie zavieršana.
Ad hłybini serca ja vykazvaju spačuvańni siemjam, jakija stracili svaich blizkich. Chaču abniać siemji našych hierojaŭ, jakija zahinuli za nas. Ich vyšejšaja achviara, u tym liku ŭ apošnija dni, nabližaje nas da pieramohi.
Darahim siemjam zakładnikaŭ ja kažu: heta važny momant u našaj vajnie. My budziem praciahvać prykładać usie namahańni, pakul vašy blizkija nie viernucca dadomu. Heta moj i naš ahulny vyšejšy abaviazak.
Žycharam Hazy ja kažu: Sinvar razburyŭ vašaje žyćcio. Jon kazaŭ vam, što jon leŭ, ale na samoj spravie chavaŭsia ŭ ciomnaj nary i pamior, sprabujučy ŭciačy ad našych sałdat. Jaho likvidacyja — važny etap u padzieńni režymu CHAMAS. Chaču skazać znoŭ i vielmi jasna: CHAMAS bolš nie budzie kiravać Hazaj. Heta pačatak epochi paśla CHAMAS, i dla vas, žychary Hazy, heta šaniec narešcie vyzvalicca ad jaho tyranii.
Terarystam CHAMAS ja kažu: vašy lidary biahuć, i jany buduć źniščany. Tym, chto trymaje našych zakładnikaŭ, ja kažu: toj, chto składzie zbroju i viernie zakładnikaŭ, atrymaje mahčymaść pajści i žyć. A chto pryčynić škodu našym zakładnikam, zapłacić za heta. My pryjdziem pa ich.
Narody rehijona, ja źviartajusia da vas: u Hazie, u Biejrucie, pa ŭsim rehijonie — ciemra adstupaje, i śviatło padymajecca. Chanija, Sinvar, Nasrała i mnohija ich sajuźniki — bolš nie z nami.
Ja zaklikaju vas, narody rehijona: u nas jość vialikaja mahčymaść spynić voś zła i stvaryć inšuju budučyniu — budučyniu miru i roskvitu dla ŭsiaho rehijona. Razam my možam prahnać praklon i nablizić dabrasłavieńnie.
Ciapier usim, u Izraili i za jaho miežami, jasna, čamu my nastojvali na praciahu hetaj vajny. Čamu my nastojvali na hetym, niahledziačy na ŭvieś cisk. Siońnia my znoŭ pakazali śvietu, što dabro pieramahaje zło.
Jak skazaŭ car David: «Ja budu pieraśledavać vorahaŭ maich i źnišču ich, i nie viarnusia, pakul nie vynišču ich usich».
My budziem zmahacca razam, i z Božaj dapamohaj — my pieramožam usie razam», — padahulniŭ svaju pramovu Nietańjachu.
Ciapier čytajuć
Knyrovič raskazaŭ, čamu były dyrektar aršanskich zavodaŭ paśla vyzvaleńnia pajšoŭ vajavać za Rasiju, dzie i zahinuŭ2
Kamientary