Hiermanija ŭviała kantrol na miažy na čas čempijanatu Jeŭropy pa futbole
Zachady nakiravanyja suprać chulihanaŭ i džychadzistaŭ.
Ź piatnicy pamiežnaja słužba Hiermanii pačała praviarać dakumienty ŭ tych, chto zajazdžaje na terytoryju krainy ź inšych dziaržaŭ Šenhienskaj zony. Praz tydzień u Hiermanii pačniecca čempijanat Jeŭropy ŭ futbole, i ŭłady krainy tłumačać uviadzieńnie pravierak imknieńniem nie dapuścić praniknieńnia ahresiŭnych futbolnych chulihanaŭ abo isłamisckich ekstremistaŭ, piša Bi-bi-si.
Hulni čempijanatu Jeŭropy buduć iści ŭ 10 niamieckich haradach z 14 červienia da 14 lipienia. Pamiežnyja pravierki praciahnucca da 19 lipienia.
Pa słovach kiraŭnika MUS Hiermanii Nensi Fiezier, sens pravierak u tym, kab nie dać patencyjnym złamyśnikam prabracca ŭ krainu.
«Naša ŭvaha budzie zasiarodžana na śpiektry ad pahrozy isłamisckaha teraryzmu da chulihanstva i kampjutarnych napadaŭ», — skazała jana. — Fiederalnaja palicyja budzie baranić miežy, aeraporty i čyhunku».
Hiermanija ŭvachodzić u skład Šenhienskaj zony, jak i amal usie krainy-susiedzi (za vyklučeńniem Šviejcaryi). A tamu kantrol na miežach krainy bolšuju častku času adsutničaje.
Adnak Šenhienskaje pahadnieńnie daje krainam-udzielnicam prava ŭvodzić časovyja pamiežnyja pravierki na nacyjanalnym uzroŭni, kali ŭ takich uźniknie nieabchodnaść.
Uviadzieńnie pamiežnaha kantrolu — sprečnaja miera: mnohija miarkujuć, što navat vybarčyja pravierki padryvajuć samu ideju svabodnaha handlu i biaźvizavaha pieramiaščeńnia ŭ ES. Adnak na čas čempijanatu niamieckija ŭłady vyrašylinie ryzykavać i skarystalisia pradastaŭlenym im pravam.
Raniej Hiermanija ŭžo ŭvodziła časovyja pravierki ŭ jakaści miery pa supraćdziejańni kantrabandzie i nielehalnym mihrantam.
Na hety raz palicyjanty atrymajuć prava pravodzić pravierki na ŭsich miežach krainy i va ŭsich vidach transpartu.
Pakolki praz hety čas padarožža moža zaciahnucca, ułady zaklikajuć usich, chto najbližejšym časam maje namier pierasiakać niamieckuju miažu, uličvać pravierki pry płanavańni pajezdki.
Dla praviadzieńnia patruloŭ na vakzałach i ŭ ciahnikach na dapamohu niamieckim palicyjantam pryjduć kala 580 kalehaŭ z-za miažy.
U Ministerstvie ŭnutranych spraŭ žurnalistaŭ zapeŭnili, što pravierki dakumientaŭ buduć «hnutkimi i časovymi».
Kamientary