Francyja aštrafavała Amazon na 32 miljony jeŭra za «naviaźlivaje» nazirańnie za supracoŭnikami
Ad supracoŭnikaŭ patrabavali apraŭdańnia za kožny pierapynak ci paŭzu.
Francuzskaja arhanizacyja pa kantroli za pryvatnaściu danych (CNIL) aštrafavała łahistyčny kompleks Amazon na 32 miljony jeŭra za vykarystańnie kampanijaj «praźmierna dakučlivaj» sistemy sačeńnia za supracoŭnikami. CNIL kaža, što sistema, jakaja vykarystoŭvajecca Amazon France Logistique, «vymiarała pierapynki ŭ pracy z takoj dakładnaściu, što patencyjna patrabavała ad supracoŭnikaŭ abhruntavańnia kožnaha pierapynku abo paŭzy».
Pa słovach CNIL, prahramnaje zabieśpiačeńnie dla nazirańnia adsočvała biaździejnaść supracoŭnikaŭ praz abaviazkovy skanier štrych-kodaŭ, jaki vykarystoŭvajecca dla apracoŭki zamovaŭ. Sistema adsočvaje čas prastoju jak pierapynki ŭ skanavańni štrych-kodaŭ. Francuzskaja arhanizacyja pryznała dakładnaść hetaj sistemy niezakonnaj na asnovie jeŭrapiejskaha Ahulnaha rehłamientu ab abaronie danych (GDPR) u jakaści pravavoj asnovy pastanovy.
Z hetaha punktu hledžańnia sprava nie kłasifikujecca jak pracoŭnaja, a chutčej jak sprava ab apracoŭcy danych datyčna praźmiernaha kantrolu. Takim čynam, apracoŭka danych supracoŭnikaŭ była pryznanaja «praźmierna nazojlivaj». CNIL adznačaje, što Amazon zachoŭvaŭ i vykarystoŭvaŭ hetyja danyja dla štotydniovaj acenki efiektyŭnaści pracy supracoŭnikaŭ.
Amazon prakamientavaŭ situacyju doŭhaj zajavaj, paviedamiŭšy što jany «kateharyčna nie zhodnyja z vysnovami CNIL, jakija faktyčna niasłušnyja», pieradaje Engaget. Kampanija paviedamiła, što moža abskardzić hetaje rašeńnie, ale pakul abdumvaje apielacyju.
Da taho ž Amazon raskazaŭ, što źjaŭlajecca nie adzinaj kampanijaj u łahistyčnaj industryi, chto vykarystoŭvaje padklučanuju składskuju sistemu takoha kštałtu, praciahvajučy raschvalvać sistemu jak dobruju pryładu dla zbałansavańnia «pracoŭnaj nahruzki pamiž kamandami» z metaj biaśpiečnaj i efiektyŭnaj apracoŭki zamovaŭ. Kampanija zajaviła, što pašyryć parohavy limit svajoj sistemy, patencyjna dajučy supracoŭnikam bolš praciahły čas, pierš čym supracoŭniku pačnuć pastupać abviestki ab prastoi (raniej hety čas składaŭ adnu chvilinu).
Darečy, na druhim bierazie Atłantyčnaha akijana kampanija apynułasia ŭ jašče bolš niepryjemnaj situacyi. Było ŭstanoŭlena, što Amazon adkazny bolš čym za pałovu traŭmaŭ składskich rabotnikaŭ u ZŠA ŭ 2022 hodzie. Kampaniju abvinavačvajuć u niadobrasumlennaj pracy ŭ niekalkich vypadkach.
Jak paviedamlałasia raniej, ciakučka kadraŭ u łahistyčnym adździele kampanii adbyvajecca z takoj vysokaj chutkaściu, što heta kaštuje Amazon 8 miljardaŭ dalaraŭ štohod. Mahčyma, kiraŭnictvu Amazon varta abmierkavać adkryćcio filijała ŭ Respublicy Biełaruś, dzie tatalny kantrol za supracoŭnikami bujnych i małych dziaržpradpryjemstvaŭ — zvyčajnaja reč.
«Arabski šejch zasunuŭ dalary ŭ kišeniu». Błohier Vadimati Jermašuk ciapier pracuje achoŭnikam luksavych bucikoŭ3
Kamientary