«Heta była pamyłka, nie treba było čapać». U Vilni pačaŭsia sud nad bajcom z pałka Kalinoŭskaha, jakoha abvinavačvajuć u śmierci pabracima
Praces prachodzić u akruhovym sudzie litoŭskaj stalicy. Na prośbu maci zahinułaha sud zrabili zakrytym na pieršym ž pasiedžańni, piša Radyjo Svaboda.
Trahičny incydent adbyŭsia 18 śniežnia 2022 hoda ŭ Vilni, na adnoj z haradskich kvater, dzie razam apynulisia abvinavačany i mierkavanaja achviara. Pavodle śledstva, były bajec pałka Kalinoŭskaha (na prośbu abvinavačanaha nie nazyvajecca jahonaje imia — RS) nažom zabiŭ svajho pabracima. Śledstva dakazvaje vinu biełarusa z dapamohaj zaklučeńniaŭ ekśpiertaŭ, na praces taksama vyklikali niekalki śviedak.
Abvinavačany, jakomu pavodle litoŭskaha zakanadaŭstva pahražaje ad 7 da 15 hadoŭ źniavoleńnia, dahetul svajoj viny nie pryznavaŭ. Pavodle biełarusa, jahony znajomy skončyŭ žyćcio samahubstvam, a paśla taho, jak heta adbyłosia, abvinavačany sprabavaŭ akazać jamu dapamohu. Prakamientavać pačatak pracesu jon admoviŭsia. U raniejšych intervju Svabodzie abvinavačany raskazvaŭ, što ŭsio adbyłosia nadzvyčaj chutka.
«Ja jeŭ makaronu i pačuŭ niejki hrukat, pavaročvaju hałavu — i baču, jak jon staić z nažom u hrudziach. Ja ŭ šoku byŭ, kinuŭsia, chacieŭ dastać hety nož, i heta była pamyłka, nie treba było čapać. Ale ja byŭ u stanie poŭnaha šoku. Za adno imhnieńnie kinuŭsia da jaho. Jon nie davaŭ mnie vyciahnuć, naadvarot, jašče bolej u siabie ŭciskaŭ. Jon uvieś hety čas stajaŭ, ja pakłaŭ jaho i staŭ klikać na dapamohu», — hetak apisvaŭ incydent abvinavačany ŭ razmovie z žurnalistam Svabody, jakaja adbyłasia ŭ žniŭni.
Da taho času biełarus prabyŭ 8 miesiacaŭ pad aryštam, trymaŭ haładoŭku, bo nie pahadžaŭsia z vystaŭlenym abvinavačańniem i patrabavaŭ ekśpiertyzy na palihrafie. U žniŭni byłomu dobraachvotniku zamianili mieru strymańnia na znachodžańnie doma z admysłovym branzaletam sačeńnia, ale abvinavačańnie nie źniali. Praz toje, što rasśledavańnie ciahnułasia bolš za 6 miesiacaŭ, spravu pieradali na razhlad u akruhovy sud Vilni.
Siońniašniaje pieršaje pasiedžańnie sudu ciahnułasia nie bolš za hadzinu. Paśla vyśviatleńnia asoby abvinavačanaha sud vysłuchaŭ maci mierkavanaj achviary, jakaja pryznanaja ŭ spravie paciarpiełaj. Žančyna znachodzicca ŭ Biełarusi, z sudom jana razmaŭlała praź videasuviaź. Paciarpiełaja paprasiła litoŭski sud zrabić praces zakrytym ź mierkavańniaŭ ułasnaj biaśpieki.
«Sudovaja sistema ŭ Biełarusi, dzie ja znachodžusia, pieraśleduje ludziej, jakija brali ŭdzieł u padziejach paśla 2020 hoda. Na žal, ja aścierahajusia, što kali buduć ahučanyja niekatoryja fakty, mianie mohuć zatrymać», — skazała paciarpiełaja.
Chadajnictva padtrymali jak dziaržaŭny abvinavaŭca, tak i abvinavačany i jahony advakat. U vyniku sudździa abviaściła, što dalej praces budzie prachodzić u zakrytym režymie. Usim naviednikam, a ich było bolš za dziesiać, daviałosia vyjści z zali.
«Pazovu vystaŭlać nie budu»
Jašče da pryniaćcia hetaha rašeńnia była abvieščanaja pazicyja paciarpiełaj adnosna hramadzianskaha pazovu na abvinavačanaha. Raniej jana nie zajaviła pretenzij i na sudzie praź videasuviaź paćvierdziła, što svajoj pazicyi nie źmianiła. «Nie, hramadzianskaha pazovu nie vystaŭlaju», — skazała sudu paciarpiełaja biełaruska.
Baćka abvinavačanaha biełarusa Siarhiej hetak prakamientavaŭ toje, što maci zahinułaha nie vystaviła pazovu.
«Dumaju, heta łahična, što jana nie choča zahadzia abvinavačvać inšaha čałavieka ŭ zabojstvie jaje syna, a choča abjektyŭnaha suda, kab va ŭsim razabracca», — skazaŭ mužčyna. Adnosna pryčyny mierkavanaha samahubstva achviary incydentu Siarhiej adkazaŭ, što ad syna ničoha nie viedaje ab pryčynach, jakija mahli padšturchnuć da takoha ŭčynku. «nie čuŭ ad jaho ničoha pra heta, a hadać nie budu», — skazaŭ Siarhiej.
Baćka abvinavačanaha krytyčna vykazaŭsia pra niekatoryja ekśpiertnyja zaklučeńni ŭ spravie syna. Pavodle Siarhieja, dva zaklučeńni, zroblenyja dziaržaŭnymi ekśpiertami, pieraduziatyja. «Vyhladaje, što śledstva adrazu schilałasia da vyznačeńnia hetaj spravy nie jak incydentu, a jak zabojstva», — miarkuje Siarhiej.
Advakat abvinavačanaha ad kamientaroŭ admoviŭsia. Praces nad biełarusam viadziecca na litoŭskaj movie, ale abvinavačanamu dapamahaje pierakładčyk litoŭskaj movy na rasiejskuju. Pavodle svajakoŭ abvinavačanaha, na minułym tydni ź jaho źniali branzalety sačeńnia i jon pačaŭ vychodzić na pracu.
Praces adnovicca 28 listapada. Na 8 śniežnia zapłanavany dopyt śviedak.
Kamientary