Jakim atrymaŭsia apošni siezon «Pałavoha vychavańnia» — samaha papularnaha sieryjała pra sučasnych padletkaŭ
Nadyšoŭ čas raźvitacca z apantanymi seksam vučniami i nastaŭnikami siaredniaj škoły Murdejł. Stvaralniki sieryjała pasprabavali ŭjavić śviet, u jakim padletki atrymlivali b nie «vyvieranuju infarmacyju», jakuju prapanujuć na ŭrokach pałavoha vychavańnia, a sapraŭdy nadziejnyja parady, źviazanyja ź ich žyćciom. Navat kali hetyja parady razdaje nie vielmi daśviedčany chłopiec, jaki handluje svaimi viedami za hatoŭku ŭ padpolnaj «seks-klinicy».
«Pałavoje vychavańnie» ad Netflix stała adnym z najlepšych aryhinalnych šou za apošnija niekalki hadoŭ, bo prapanavała nie tolki šmat seksu, ale i historyju pra sapraŭdnyja prablemy padletkaŭ: pra ich pieražyvańni, sproby nablizicca adno da adnaho, pošuk samavyjaŭleńnia i stasunki z baćkami.
Staŭšy sučasnym adkazam na sastarełyja navučalnyja videaroliki, sieryjał daśledavaŭ usie mahčymyja hrani seksualnaha žyćcia z punktu hledžańnia padletka. U im zakranuta ŭsio: ad hihijeny, masturbacyi i ŭsprymańnia svajho cieła da padletkavaj ciažarnaści i abortaŭ, — a taksama ŭ im dalikatna viadziecca razmova pra seksualny hvałt, narkamaniju i psichičnaje zdaroŭje. Šou — nie tolki pra seks i intymnaść, ale i pra siabroŭstva, adnosiny i pryniaćcie siabie takim, jaki ty jość. Da taho ž jano niaźmienna zastajecca paciešlivym.
U niečym śviet, jaki demanstrujecca ŭ «Pałavym vychavańni», moža vyklikać sum i zajzdraść: kali my ŭzhadajem ułasnyja školnyja hady, źjavicca adčuvańnie, što nam vidavočna brakavała takich razmoŭ ź siabrami pra svaju pačućciovaść, seksualnaść i identyčnaść. Zastajecca spadziavacca, što sučasnyja padletki zmohuć razmaŭlać mienavita tak, jak pakazvaje nam heta kamiedyjnaja drama.
Pieršy siezon Sex Education vyjšaŭ u 2019-m hodzie, i ź jaho hledačy daviedalisia, što hałoŭny hieroj Ocis razam ź siabram Erykam pierajšli ŭ starejšuju škołu. Mama Ocisa — seksołah, i Ocis vyrašaje ŭziać ź jaje prykład i pačynaje kansultavać školnikaŭ nakont pytańniaŭ intymnaj blizkaści — praŭda, u jaho niama kabinieta, tamu dla zadušeŭnych razmoŭ davodzicca vykarystoŭvać školnuju prybiralniu. Hałoŭny hieroj nie toje kab vielmi daśviedčany, adnak jon ščyra žadaje dapamahčy kožnamu, i jaho «seks-klinika» stanovicca papularnaj.
Pierad hledačom paŭstaje halereja cikavych piersanažaŭ — ad nie vielmi paśpiachovaha vučnia Adama, jaki daśleduje svaju biseksualnaść i pakutuje ad napadkaŭ tyraničnaha baćki, da talenavitaj, ale vielmi zakrytaj dziaŭčynki Mejv, jakaja vielmi rana była vymušanaja stać darosłaj, bo jaje maci maje prablemy z narkotykami. Jość tut i linii darosłych, naprykład, historyja depresiŭnaha i tyraničnaha dyrektara škoły Marcina Hrofa.
Dziejańnie čaćviortaha siezona, jaki vyjšaŭ 21 vieraśnia, razhortvajecca va ŭtapična talerantnaj škole, kudy pierajechali vučni. U novaj škole jość miesca dla ŭsich i kožnaha — biseksuałaŭ, ludziej z abmiežavanymi mahčymaściami i defiektami źniešnaści — i naohuł vitajucca lubyja sposaby samavyjaŭleńnia. A ŭsie prablemy vučni abmiarkoŭvajuć i prymajuć rašeńni samastojna, a nie pad ciskam kiraŭnictva.
Ocis choča praciahvać vieści kansultacyi, adnak vyśviatlajecca, što ŭ kampusie ŭžo jość svoj seksołah — dziaŭčynka, jakuju zavuć O. Ocis i O pačynajuć kankuravać, a paralelna z hetym razhortvajucca siužetnyja linii inšych hierojaŭ: Eryk usio mienš kamunikuje z Ocisam i ŭsio lepš pačuvajecca ŭ kampanii novych siabroŭ, Kał pieražyvaje stres, źviazany ź jaje niebinarnaj identyčnaściu, były spartsmien Džeksan padazraje ŭ siabie złajakasnuju puchlinu i sprabuje znajści svajho baćku, a Džyn, mama Ocisa, zmahajecca z paślarodavaj depresijaj i adnačasova sprabuje ŭładkavacca viadučaj radyjošou pra seks i adnosiny.
Na žal, nie ŭsie hetyja siužetnyja linii atrymlivajuć naležnaje raźvićcio: pa-pieršaje, pakolki ich vielmi šmat, nie ŭsie hieroi paśpiavajuć jak śled raskrycca, pa-druhoje, niekatoryja kanflikty prosta vyhladajuć nie nadta pierakanaŭčymi.
Jak i papiarednija siezony, čaćviorty taksama bahaty na pakaz pradstaŭnikoŭ ŁHBTK+ z šeraham roznych prajaŭ seksualnaści i identyčnaści. Adnak hałoŭnym niedachopam sieryjała stała toje, što jaho ton pačaŭ nahadvać sacyjalnuju rekłamu. Toje, što šou tak dobra ŭdavałasia ŭ minułym — raspaviadać pra inkluziŭnaść i adnosiny pa madeli «pakazvaj, a nie raskazvaj», — u hetym siezonie źnikła, i hladač časta atrymlivaje idejnyja pałymianyja pramovy zamiest realnych čałaviečych pavodzin. «Cudoŭnyja razbeščanyja padletki, jakich my viedali i lubili, pieratvarylisia ŭ surjoznych zanud, jakija razmaŭlajuć terapieŭtyčnaj movaj i isnujuć u sieryjale hałoŭnym čynam dla taho, kab pastavić ptušački», — piša ahladalnica The Guardian Lusi Manhan.
Horka-sałodkaje raźvitańnie: pakolki heta apošni siezon, to ŭ kancy stvaralniki sprabujuć raźviazać linii, źviazanyja ź piersanažami, maksimalna akuratna — i heta ŭdajecca, choć niekatoraj mahii papiarednich siezonaŭ prykmietna nie chapaje. Tym nie mienš prychilniki ŭsio adno buduć sumavać pa «Pałavym vychavańni» jak pa ŭtapičnaj prastory, dzie kožnaha čałavieka mohuć pryniać takim, jakim jon jość, dzie humar, ščyraść i siabroŭstva pieraadolvajuć usie pieraškody.
Kamientary
I za što tolki hetuju redakcyju NN z takimi pohladami ŭ krainie Jeŭrasajuza trymajuć? ))
https://d2accbiqacj5y8.cloudfront.net/327289