Jak maleńkaja hrupa bajcoŭ zrabiła mahčymym vyzvaleńnie Rabocina. Historyja, vartaja Halivuda
Ministr zamiežnych spraŭ Ukrainy Dźmitryj Kuleba raspavioŭ akaličnaści pośpiechu kontrnastupleńnia ŭkrainskich abaroncaŭ u vioscy Rabocina ŭ Zaparožskaj vobłaści.
Kuleba na kanfierencyi pasłoŭ Francyi raspavioŭ, što prosta ciapier Uzbrojenyja siły Ukrainy praciahvajuć prasoŭvacca napierad u chodzie kontrnastupleńnia, piša «UP».
«Heta nadzvyčaj składana. Kolkaść minnych paloŭ i fartyfikacyj biesprecedentnaja. Rasijskija drony, viertaloty i samaloty daminujuć u pavietry. Ale nam pastupova ŭdajecca. Niekalki dzion tamu my prarvali rasijskuju abaronu na adnym z samych składanych učastkaŭ frontu i vyzvalili stratehična važny nasieleny punkt Rabocina», — raspavioŭ Kuleba.
Pavodle jaho, niekalki miesiacaŭ ukrainskaje padraździaleńnie viało bieśpierapynnyja šturmy na hetym učastku frontu, ale z-za źniasileńnia i strat u niejki momant straciła zdolnaść praciahvać nastup. Tady byli pryniatyja «radykalnyja rašeńni»: u padraździaleńni źmianili kiraŭnictva.
Ministr raspavioŭ, što novy kamandzir paprasiŭ sabrać matyvavanych i hatovych vykonvać bajavyja zadačy bajcoŭ. Była stvorana zvodnaja hrupa z 31 bajca, tracina ź jakich nie mieła bajavoha vopytu, ale ŭsie jany mieli viedy i volu da pieramohi.
Pa słovach Kuleby, dziakujučy lidarstvu kamandziraŭ i siaržantaŭ hetaja hrupa naładziła «haryzantalnyja suviazi» z sumiežnymi padraździaleńniami i prystupiła da pracy na linii sudakranańnia.
«Za 18 hadzin jany prapaŭzali litaralna na žyvatach kiłamietry minnych paloŭ, dzie na kožny kvadratny mietr rasijanie pastavili pa šeść min», — skazaŭ jon.
Padraździaleńnie vybiła z pasadak rasiejcaŭ i dvoje sutak trymała pazicyju, pakul nie padyšło padmacavańnie.
«Paśla hetaja hrupa prajšła jašče 10 kiłamietraŭ z zaplečnikami pa 35-40 kiłahramaŭ vahi pa minnych palach. Jany paśpieli tolki koratka pieravieści dychańnie i adrazu pajšli na šturm umacavanych rasijskich pazicyj, vybili voraha adtul i pratrymalisia da padychodu asnoŭnych sił.
Usiaho za 40 dzion heta padraździaleńnie praviało šeść šturmaŭ i dźvie vyviedki.
Hrupa z 31 čałavieka vykanała pracu cełaha bataljona, jaki pavinien byŭ by składacca dzieści z 400 čałaviek. Straty skłali 7 paranienych, ź jakich adzin ciažki, jon nastupiŭ na minu.
Faktyčna praca hetaj hrupy zrabiła mahčymym nastup cełaj bryhady na Rabocina i jaho vyzvaleńnie paśla tydniaŭ šturmaŭ. Paśla zamacavańnia na jaho fłanhach my adkryvajem šlach na Takmak i, narešcie, Mielitopal i miažu z Krymam», — skazaŭ Kuleba.
Siły abarony Ukrainy sprabujuć prasoŭvacca z kontrnastupleńniem u kirunku Takmaka i Mielitopala ŭ Zaparožskaj vobłaści.
22 žniŭnia stała viadoma, što ŭkrainskija abaroncy z 47 bryhady z bojem uvajšli ŭ siało Rabocina Zaparožskaj vobłaści i arhanizavali evakuacyju mirnych žycharoŭ, rasiejcy tady abstrelvali siało z artyleryi.
23 žniŭnia, u Dzień Dziaržaŭnaha ściaha Ukrainy, hałoŭnakamandujučy USU Valeryj Załužny apublikavaŭ videa z Rabocina: nad vioskaj łunaŭ ukrainski ściah.
28 žniŭnia namieśnik ministra abarony Hanna Malar paćvierdziła, što siły abarony całkam vyzvalili siało Rabocina.
Ciapier čytajuć
«Zabić jaho ci adrezać jamu jajcy ja nie rašyŭsia». Padrabiaznaści trahiedyi ŭ Hdańsku, dzie vajar katavaŭ bojfrenda, a paśla zabiŭ siabie45
Kamientary