Iran ustaloŭvaje kamiery, kab adsočvać i karać žančyn biez chidžabaŭ
Iranskaja palicyja, kab spynić rost parušeńniaŭ abaviazkovaha dres-kodu siarod žančyn, budzie ŭstaloŭvać kamiery nazirańnia ŭ hramadskich miescach i na darohach, piša Reuters.
Paśla taho, jak žančyny biez chidžabaŭ buduć apaznany, jany atrymajuć paviedamleńni z papiaredžańniem ab nastupstvach.
Hety krok nakiravany na «praduchileńnie supracivu zakonu ab chidžabie», havorycca ŭ zajavie, raspaŭsiudžanaj sudovym infarmacyjnym ahienctvam Mizan i inšymi dziaržaŭnymi ŚMI. Tam adznačajecca, što taki supraciŭ hańbić duchoŭny imidž Irana i sieje niaŭpeŭnienaść.
Usio bolšaja kolkaść iranskich žančyn admaŭlajecca ad chidžabaŭ paśla śmierci 22-hadovaj kurdzianki Machsy Amini. 13 vieraśnia 2022 hoda ŭ Tehieranie jaje zatrymała palicyja noravaŭ. Dziaŭčynu abvinavacili ŭ tym, što jana zamiest chidžaba mieła chustku. I z palicejskaha pastarunka žyvoj jana ŭžo nie vyjšła.
Pavodle aficyjnaj viersii, Machsa Amini pamierła ŭ palicejskim padraździaleńni praz prablemy z sercam. Ale, pa źviestkach ŚMI, dziaŭčyna pamierła ŭ špitali. Tudy jaje dastavili mocna źbitaj, ź pierałamanym čerapam, i jana znachodziłasia ŭ stanie komy. Pra jaje śmierć było abjaŭlena 16 vieraśnia.
Siły biaśpieki žorstka zadušyli pratesty paśla jaje śmierci.
Ale, niahledziačy na ryzyku aryštu za parušeńnie abaviazkovaha dres-kodu, žančyn pa-raniejšamu časta možna ŭbačyć biez chidžabaŭ u handlovych centrach, restaranach, kramach i na vulicach pa ŭsioj krainie.
U subotniaj zajavie palicyi z nahody zakona ab chidžabach utrymlivajecca zaklik da ŭładalnikaŭ pradpryjemstvaŭ «surjozna sačyć za vykanańniem hramadskich normaŭ z dapamohaj svaich pilnych pravierak».
Pavodle zakonaŭ isłamskaha šaryjatu Irana, uviedzienych paśla revalucyi 1979 hoda, žančyny abaviazany pakryvać vałasy i nasić doŭhaje, svabodnaje adzieńnie, kab schavać svaju fihuru. Parušalnicam pahražali publičnyja vymovy, štrafy abo aryšt.
U zajavie Ministerstva ŭnutranych spraŭ ad 30 sakavika havaryłasia, što adstupleńniaŭ pa hetym pytańni nie budzie. Jano zaklikała hramadzian supraćstajać žančynam biez chidžabaŭ.
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary