Da «ekstremisckich» adnieśli sacsietki byłoj karespandentki «Rehijanalnaj haziety»
Ułady praciahvajuć cisk na «Rehijanalnuju hazietu». Śledam za aryštam hałoŭnaha redaktara Alaksandra Manceviča ŭ pieralik «ekstremisckich materyjałaŭ» dadali kantent sacsietak i navat akaŭnt kolišniaj supracoŭnicy vydańnia, piša BAŽ.
Rašeńniem suda Maładziečanskaha rajona ad 27 sakavika «ekstremisckimi materyjałami» pryznanaja infarmacyjnaja pradukcyja akaŭnta ŭ sacsietcy Instagram z nazvaj «Rehijanalnaja hazieta».
Toj ža sud pastanaviŭ nadać anałahičny «jarłyk» staronkam u sacsietkach byłoj žurnalistki «Rehijanalnaj haziety» Zoi Chruckaj. Prynamsi ŭ rezulatyŭnaj častcy paznačana, što «padlahaje nieadkładnamu vykanańniu» pastanova ab pryznańni «ekstremisckim» kantentu ŭ sacsietcy ŭkantakcie z nazvaj «Zoja Chruckaja».
Jak stała viadoma Biełaruskaj asacyjacyi žurnalistaŭ, da bolšaści dziejnych i byłych supracoŭnikaŭ «Rehijanalnaj haziety» ŭ sakaviku naviedvalisia z ahladami i apytańniami pradstaŭniki pravaachoŭnych struktur, ciapier žurnalisty pad padpiskami ab «nierazhałošvańni».
15 sakavika siłaviki zładzili ŭ Vilejcy pieratrus doma ŭ hałoŭnaha redaktara i zasnavalnika vydańnia Alaksandra Manceviča. Praz dva tydni pad vartaj Śledčy kamitet inkryminavaŭ jamu kryminalny artykuł 369-1 (raspaŭsiudžvańnie zaviedama iłžyvych źviestak, jakija dyskredytujuć Biełaruś i jaje orhany ŭłady).
Raniej u pieralik ekstremisckich materyjałaŭ užo trapili aficyjny sajt vydańnia — rh.by, karparatyŭny telehram-kanał, a taksama staronka ŭ rasijskaj sacsietcy UKantakcie.
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary