U Białhradzie admianili kancert «Lapisa Trubiackoha», vykanaŭcam nie dali sierbskija vizy
Kancert biełaruskaha hurta «Lapis Trubiacki», jaki pavinien byŭ adbycca ŭ Białhradzie ŭ Domie moładzi 12 lutaha, admienieny. Paviedamleńnie pra heta źjaviłasia na sajcie Doma moładzi, piša Reform.by.
U paviedamleńni havorycca, što pryčynaj skasavańnia nibyta stała «kiepskaje samaadčuvańnie frontmena hurta».
Arhanizatar kancerta, ATF Booking, prapanuje mahčymaść viarnuć hrošy za nabyty bilet abo abmianiać jaho na mahčymaść naviedać inšyja mierapryjemstvy, jakija jon arhanizuje.
Prarasijski sajt RuSerbia.com, nie chavajučy radaści, dzielicca padrabiaznaściami admieny kancerta. Mienavita hety sajt zaŭvažyŭ anons mierapryjemstva pry kancy minułaha hoda i inicyjavaŭ kampaniju ckavańnia. Da jaje padklučylisia adepty «ruskaha śvietu» ŭ Sierbii ź niekalkich arhanizacyj.
«Aściarohi z nahody praviadzieńnia kancerta akazalisia marnymi: dziakujučy mahutnamu hramadskamu rezanansu, ćviordaj reakcyi palityčnych partyj (siarod jakich, u pryvatnaści, «Dźviery», Radykalnaja partyja i «Sierbskija pravyja»), mierapryjemstva było admienienaje», — ličać u redakcyi prakramloŭskaha prajekta.
RuSerbia.com pryvodzić adkaz arhanizataraŭ kancerta z nahody admieny. U im havorycca pra pahrozy, jakija pastupali na adras muzykaŭ i arhanizataraŭ, a taksama pra toje, što va ŭdzielnikaŭ hurta ŭźnikli prablemy z atrymańniem viz. Taksama paćviardžajecca drennaje samaadčuvańnie Siarhieja Michałka:
«Siabry, my sa škadavańniem vymušanyja paviedamić vam, što zaŭtrašni kancert hurta «Lapis Trubiacki» admianiajecca pa pryčynach, niezaležnych ad arhanizataraŭ i hurta. My nie bajalisia pravodzić kancert, niahledziačy na:
1) palityčny cisk;
2) himn Majdana, za jaki Michałka zapisali ŭ nieanacysty;
3) chvarobu artysta, u jakoha siońnia vysokaja tempieratura (39);
4) pastupleńnie pahroz žyćciu i fizičnaj raspravy;
5) niehatyŭnuju presu i šerah inšych faktaraŭ, jakija naŭprost ci ŭskosna pieraškadžali praviadzieńniu kancerta. Navat mierč nadrukavali.
Ale, na žal, prablemy ź vizami dla artystaŭ, častka ź jakich źjaŭlajucca niehramadzianami i rezidentami Estonii (pašparty čužyncaŭ abo Aliens pašparty) stali niepieraadolnaj pieraškodaj.
My tak i nie atrymali adkazu z konsulstva Sierbii ŭ Chielsinki i pryniali rašeńnie pra admienu kancertu ź vialikim bolem».
U sierbskich prakramloŭskich pablikach z hetaj nahody panuje radaść. Ciapier jany viaduć kampaniju, kab kancerty byli admienienyja i ŭ Čarnahoryi.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»3
Kamientary