Što pahladzieć. «1899» — sieryjał, što zastajecca zahadkaj da samaha kanca

Hetaja historyja z vaśmi sieryj źmiaščaje ŭ sabie ašałamlalnuju kolkaść tajamnic i niečakanych pavarotaŭ, što robić «1899» idealnym sieryjałam dla zapojnaha prahladu niekalkich sieryj zapar, śćviardžaje The Verge.

«1899» — sieryjał, u jakim možna pačuć niekalki moŭ. Jaho padziei adbyvajucca na pasažyrskim karabli ŭ 1899 (jak niečakana) hodzie, i karabiel pieravozić hrupu ludziej ź Jeŭropy ŭ ZŠA. Siarod ich francuzskaja para maładych, zadumlivy niemiec-kapitan, ispanski śviatar i jaho raśpieščany brat, maci i dačka z Kitaja, vuhalščyki z Polščy i Anhlii, biednyja datčanie, jakija zapoŭnili nižniuju pałubu, i šmat inšych ludziej. U centry ŭsiaho hetaha verchału znachodzicca anhličanka Maŭra, jakaja vyvučała miedycynu, ale nie moža być praktykujučym doktaram, bo jana žančyna.

Jak časta byvaje ŭ takich historyjach, spačatku hieroi majuć nie nadta šmat supolnaha pamiž saboj, jany ŭsie ad niečaha źbiahajuć i chavajuć važnuju tajnu. Kožnaja sieryja pačynajecca z raskazu pra adnaho ź piersanažaŭ, što dazvalaje hledačam ujavić, chto hety čałaviek i čamu jon apynuŭsia na karabli. Takim čynam možna było b stvaryć dramatyčnuju historyju, ale «1899» nie padychodzić dla detalnaha raskryćcia charaktaraŭ, bo padziei ŭ im nadta chutka robiacca niezvyčajnymi.

Kali hrupa ludziej zastajecca adna na karabli, nie dziva, što vakoł ich pačynajuć adbyvacca niezvyčajnyja rečy, i z časam usio robicca jašče bolš zabłytanym. Karabiel ustupaje ŭ kantakt z «Pramietejem», padobnym da jaho ž sudnam, jakoje zahadkavym čynam zatanuła čatyry miesiacy tamu. Navokał, mahčyma, błukajuć pryvidy, a tuman tam staić taki husty, što jamu pazajzdrościŭ by sam Styvien Kinh. Jość piersanažy sa stračanymi ŭspaminami i niajasnymi matyvami, a kali ludzi pamirajuć i ŭspychvaje hnieŭ, navat pačynajecca bunt. Ale hetyja rannija tajamnicy pastupova ćmianiejuć u paraŭnańni z tym, što nasamreč chavaje za saboj sieryjał.

Jość u pabudovie sieryjała niekalki dziŭnych rečaŭ. Jaho stvaralniki čamuści vyrašyli zakančvać kožnuju sieryju kłasičnymi rok-kampazicyjami, i hetyja pieśni hučać vielmi niedarečna na fonie astatnich miełodyj saŭndtreka. A jašče piersanažy vielmi lubiać vieści manałohi pierad ludźmi, jakija nie razumiejuć ich movu i tamu absalutna nie ŭjaŭlajuć, što im kažuć. Moža, heta i dobryja manałohi, ale ciažka pavieryć, što inšyja pasažyry buduć siadzieć i kivać, kali nie razumiejuć ni słova. Taksama treba papiaredzić, što «1899» — heta davoli ciomnaja i zmročnaja historyja, u jakoj mała humaru i jość adzin vielmi ciažki epizod seksualnaha hvałtu.

Tym nie mienš, heta idealnaje šou dla fanataŭ mistyki, takoje, pra jakoje pryjemna havaryć, navat kali vas nie zadavalniaje finał. Mała što moža lepš adciahnuć uvahu ad bytavych spraŭ, čym pytańnie, čamu na karabli-pryvidzie milhajuć žuki abo čamu tvar adnaho z členaŭ ekipaža nie zažyvaje.

Rejtynh na vialikich suśvietnych resursach:

IMDB — 7,7/10

Rotten Tomatoes — 79% (krytyki), 75% (hledačy)

«Pieryfieryjnyja pryłady» (The Peripheral) — fantastyčny sieryjał ad stvaralnikaŭ «Śvietu Dzikaha Zachadu»

Kudy schadzić: šalony hajd pa sučasnym mastactvie i jašče 8 kłasnych iventaŭ dla amataraŭ kino

Što pahladzieć. «Anhličanka» (The English) — najlepšy viestern za doŭhi čas

• 3
• 0
• 3
• 2
• 2
• 2
• 4
• 0