ZŠA aficyjna abviaścili ab novym pakiecie vajennaj dapamohi Ukrainie, jaki ŭklučaje RSZA
Siońnia ranicaj prezident ZŠA Džo Bajden abviaściŭ ab novym pakiecie dapamohi ŭ halinie biaśpieki dla Ukrainy, jaki ŭklučaje pieradavyja reaktyŭnyja sistemy załpavaha ahniu. Pra heta na sumiesnaj pres-kanfierencyi z hienieralnym sakratarom NATA Jensam Stołtenbierham zajaviŭ dziaržsakratar ZŠA Entani Blinkien.
Dapamoha nadajecca, kab Ukraina mahła dać adpor rasijskaj ahresii i ŭzmacnić svaje pazicyi na pieramovach, skazaŭ Blinkien.
«Adnosna zbroi, jakuju budzie dadziena, ukraincy zapeŭnili nas, što jany nie buduć vykarystoŭvać hetuju sistemu suprać celaŭ na rasijskaj terytoryi. Pamiž Ukrainaj, ZŠA i našymi partniorami jość davier», — skazaŭ Blinkien.
Dziaržsakratar adznačyŭ, što Bajden vyrazna papiaredžvaŭ rasijskaha dyktatara Uładzimira Pucina jašče da pačatku poŭnamaštabnaha ŭvarvańnia, što mienavita tak ZŠA zrobiać, kali RF pojdzie na novuju ahresiju.
Raniej The New York Times paviedamlała, što novy pakiet uklučaje vajskovuju techniku na $ 700 młn, u tym liku supraćtankavyja rakiety Javelin, artyleryjskija snarady, viertaloty i taktyčnyja mašyny.
Pa słovach krynic vydańnia, u novy pakiet uvojduć taksama ŭstanoŭki HIMARS. Heta vysokadakładnaja zbroja sa spadarožnikavym naviadzieńniem i mahutnaściu vybuchu, paraŭnalnaj z 225-kiłahramovaj avijabombaj. Radyus jaje dziejańnia (kala 77 km) značna pieravyšaje radyus dziejańnia luboj artyleryi, jakuju ciapier vykarystoŭvaje Ukraina.
Kamientary