Padčas bajoŭ za Maryupal paranieny čačeniec, padazravany ŭ zabojstvie Niamcova
Padčas bajoŭ za Maryupal atrymaŭ ranieńnie były namieśnik kamandzira bataljona «Poŭnač» Rusłan Hieramiejeŭ — fihurant spravy ab zabojstvie palityka Barysa Niamcova. Pra heta paviedamiŭ kiraŭnik Čačni Ramzan Kadyraŭ, nazvaŭšy Hieramiejeva «darahim bratam».
«Siońnia pa darozie ŭ Maryupal ja naviedaŭ darahoha brata i asabista pierakanaŭsia, što jaho žyćciu ničoha nie pahražaje. Jon paśpiachova idzie na papraŭku i hatovy ŭ najbližejšy čas znoŭ stać u stroj», — napisaŭ Kadyraŭ.
Zabojstva Niamcova adbyłosia ŭ Maskvie ŭ lutym 2015 hoda. U datyčnaści da zabojstva padazravali niekalkich uradžencaŭ Čačni. Śledčyja chacieli dapytać taksama i Hieramiejeva, adnak, jak śćviardžałasia, nie znajšli jaho.
Akramia praviedvańnia «darahoha brata», Kadyraŭ siońnia taksama zajaviŭ, što rasijskuju «śpiecapieracyju» va Ukrainie spyniać nielha:
«Ja zajaŭlaju, što treba zaviaršyć pačataje, nie spyniacca. Treba zajści ŭ Kijeŭ i zabrać Kijeŭ. Kali b nas pakinuli kala Kijeva, to ja bolš čym upeŭnieny, što my zajšli b u Kijeŭ i naviali b paradak».
Takoje mierkavańnie idzie ŭrazrez z aficyjnaj pazicyjaj rasijskich uładaŭ, jakija na pieramovach z ukraincami ŭ Stambule havorać pra spynieńnie eskałacyi na Kijeŭskim i Čarnihaŭskim napramkach. Praŭda, čamuści nie ŭklučajučy ŭ paniaćcie deeskałacyi spynieńnie ahniu.
Kamientary