Dysident z 6-ha «A». Maskoŭski školnik vykazaŭsia suprać vajny — jamu ŭ kvatery adklučyli elektryčnaść
Na ŭroku historyi maskoŭski školnik vykazaŭ svaju pazicyju z nahody vajny. Paśla hetaha da jaho dadomu pryjšła palicyja i adklučyła elektryčnaść, piša «Novaja hazieta».
Kiryłu 12 hadoŭ, jon vučycca ŭ 6-m kłasie maskoŭskaj škoły. Jaho mama Natalla kaža, što ŭ chłopčyka ŭkrainskija karani, jon naviedvaŭ Ukrainski kulturny centr. Toje, što zaraz adbyvajecca pamiž Rasijaj i Ukrainaj, pryčyniaje jamu bol.
U piatnicu 4 sakavika ŭ šaścikłaśnikaŭ byŭ zvyčajny ŭrok historyi. Sam Kirył raspaviadaje tak ab tym, što adbyvałasia:
«Nastaŭnica skazała: «Naohuł z šaścikłaśnikami heta nie abmiarkoŭvajecca, ale kali chočacie zrazumieć, što adbyvajecca, to zadavajcie pytańni». I ja staŭ zadavać pytańni.
Ja spytaŭ: «Čamu Pucin pačaŭ vajnu?» Na heta nastaŭnica adkazała, što heta «śpiecapieracyja». Jana skazała: «Ja dakładna nie viedaju, dzie ciapier znachodziacca našy vojski, ale kali b jany spynilisia na paŭdarozie, to ahresija Ukrainy b praciahnułasia».
Nievialikaja častka kłasa była na maim baku, jany taksama zadavali pytańni. Nastaŭnica skazała: «Śpiecyjalisty Ukrainy i ZŠA ciapier robiać fejkavyja pasty, kažuć, što na mitynhach źbivajuć ludziej. Ale mitynhi pavinny być uzhodnienymi». Ja spytaŭ «Jak možna ŭzhadnić z uradam mitynh suprać dziejańniaŭ samoha ŭrada?» Jana mnie tołkam nie dała adkazu.
Paśla hetaha ja zadaŭ pytańnie, navošta heta naohuł chtości pačaŭ i kali heta ŭsio skončycca? Jana skazała, što pačała heta Ukraina, a skončycca, kali Ukraina kapituluje.
Jana kazała jašče nam, što va ŭkraincaŭ kvitnieje nacyzm, što ź pieršaha kłasa ŭ padručnikach pišuć, što Ukraina — heta zvyšdziaržava. U mianie šmat siabroŭ z Ukrainy, Ja pytaŭsia ŭ ich — u ich niama hetaha ŭ padručnikach».
Paśla hetaha, jak raspaviadaje Kirył, jon pajšoŭ na inšy ŭrok i zakryčaŭ u kalidory: «Słava Ukrainie!». Niekatoryja sa školnikaŭ, što siadzieli ŭ kalidory, adhuknulisia ŭ adkaz.
Na nastupnuju ranicu mamie chłopčyka patelefanavała jaho kłasnaja kiraŭnica. Jana zaprasiła Natallu pryjści ŭ škołu. Patłumačyła, što supracoŭniki inśpiekcyi pa spravach niepaŭnaletnich chočuć pravieści z synam i ź joj hutarku.
Natalla pryjechała ŭ škołu i napisała zajavu, što zabiraje syna «ŭ suviazi z tym, što na dzicia akazvajuć cisk i stvarajuć nievynosnyja ŭmovy dla atrymańnia adukacyi» z-za jaho palityčnych pohladaŭ. Pasadziła jaho ŭ taksi i paviezła na pracu. U školnych dźviarach sutyknułasia z hrupaj palicejskich.
U niadzielu Kirył byŭ doma adzin. Mama źjechała na pracu. U hety čas u kvateru stali hrukacca dvoje palicejskich, ale Kirył nie staŭ adčyniać.
Jany hrukalisia kala paŭhadziny, zatym u kvatery adklučyli elektryčnaść, pakinuli pad dźviaryma paviestku «ab vykliku na apytańnie» i syšli. U poźvie-nierazborliva napisanaja data apytańnia i pahroza «padvierhnuć pryvadu» ŭ vypadku niajaŭki.
Kamu ž pryjšła ŭ hałavu ideja paskardzicca na niadobranadziejnaha šaścikłaśnika ŭ palicyju? U siamji — daŭni kanflikt sa škołaj. Mama ciapier pieravažna maje znosiny z administracyjaj piśmova. Ale ličyć, što pierš čym źviartacca ŭ palicyju, možna było chacia b napisać abo patelefanavać joj. Chto paskardziŭsia ŭ palicyju, jana nie viedaje.
Natalla kamientuje: «Mnie zdajecca, usiamu jość miaža. Ja razumieju, kali b syn kahości ŭdaryŭ, traŭmavaŭ, napisaŭ by niešta na ścianie.
I, hałoŭnaje, što ciapier? Mianie abaviažuć tranślavać jamu aficyjny punkt hledžańnia? A jašče, pa-mojmu, važna i ŭ takich składanych umovach demanstravać dzieciam, što navat kali punkty hledžańnia nie supadajuć, treba šukać mirnaje rašeńnie, a nie vyklikać ludziej u formie».
Kirył spakojna tłumačyć svaju pazicyju:
«Ja liču, što nastaŭniki nie majuć racyi. Nam kažuć, što žycharam Ukrainy pramyvali mazhi, a mnie zdajecca, što mazhi tut pramyvali nam».
Kamientary