Vybarčych učastkaŭ za miažoj padčas refierendumu nie budzie. Mała ludziej, karanavirus, «terarystyčnyja pahrozy»…
Vybarčych učastkaŭ za miažoj padčas praviadzieńnia kanstytucyjnaha refierendumu stvarać nie płanujecca, paviedamiŭ pres-sakratar MZS Anatol Hłaz. Bo, maŭlaŭ, niemahčyma heta pravieści biaśpiečna z-za karanavirusa i «terarystyčnaj pahrozy». A taksama na konsulskim uliku mała ludziej.
«Na siońniašni dzień bolš za tracinu zamiežnych ustanoŭ nie ŭtvarali ŭčastki pa pryčynie niaznačnaj kolkaści hramadzian, jakija znachodziacca na konsulskim uliku» — skazaŭ Anatol Hłaz.
U Litvie i Łatvii «z pryčyny dziejańniaŭ biełaruskich susiedziaŭ» nibyta niama dastatkovaj kolkaści piersanału, kab zabiaśpiečvać pracu ŭčastka. Mnohija ambasady i konsulstvy nibyta pryniali rašeńnie nie padviarhać ryzycy zdaroŭje supracoŭnikaŭ i tych, chto hałasuje, u suviazi z rezkim źmianieńniem epidemijałahičnaj abstanoŭki ŭ krainach znachodžańnia.
Da taho ž «padčas papiaredniaj vybarčaj kampanii na adras členaŭ vybarkamaŭ i rabotnikaŭ zamiežnych ustanoŭ pastupali šmatlikija pahrozy, rabilisia pravakacyi i akcyi chulihanskaha i ekstremisckaha charaktaru. Było b vielmi naiŭna mierkavać, što kiraŭniki našych zamiežnych ustanoŭ zapluščać vočy na aburalnyja fakty zusim niadbajnaha staŭleńnia šerahu krain JEZ da svaich abaviazkaŭ u zabieśpiačeńni biaśpieki dypłamatyčnych pradstaŭnictvaŭ», — adznačyŭ Anatol Hłaz.
Pry hetym, na dumku MZS: «Usio heta nijakim čynam nie pieraškadžaje kanstytucyjnamu pravu hramadzian Biełarusi pryniać udzieł u majučym adbycca refierendumie. Tradycyjna dola tych, chto hałasuje za miažoj-mienš za 1%».
Tyja ž, chto časova znachodzicca za miažoj, zaprašajucca dla hałasavańnia ŭ Biełaruś.
Paśla apošnich prezidenckich vybaraŭ za miažu źjechali dziasiatki, a pa niekatorych źviestkach, i sotni tysiač biełarusaŭ.
Nahadajem, jak na zamiežnych učastkach hałasavali padčas prezidenckich vybaraŭ 2020 hoda.
U mnohich pasolstvach i konsulstvach Biełarusi za miažoj hałasy tady paličyli sumlenna. Tak, u Ńju-Jorku Śviatłana Cichanoŭskaja pa aficyjnych źviestkach atrymała 93,2%, u Miunchienie — 91,7%, u Tel-Avivie — 91,5%, u Łondanie — 80,1%, u Rymie — 79,7%, u Stakholmie — 75,6%. Ale varta adznačyć, što ekzit-poły, jakija pravodzili biełarusy zamiežža, davali joj navat 95% hałasoŭ.
Na ŭčastkach u Rasii Cichanoŭskaja prajhrała, ale nieistotna: u Sankt-Pieciarburhu Cichanoŭskaja nabrała 45,8%, a Łukašenka - 51,1%. Prykładna toje ž samaje było i ŭ Maskvie. Pry hetym tam u asnoŭny dzień hałasavańnia sotni ludziej nie zmahli prahałasavać — učastki pracavali vielmi marudna.
Ciapier čytajuć
«My kidali kamiani, kab jany nie ŭźlatali». Adnym z tych, chto sprabavaŭ spynić drony, što vylatali z fur, byŭ biełarus Anton42
Kamientary