Nie tak daŭno respublikanskaje hramadskaje abjadnańnie «Biełaruskaje kazactva» raspačało achovu Minskaha zaaparka.
Kazacki patrul sočyć za paradkam na terytoryi zaaparka pa vychadnych dniach. «Pakul heta tolki ekśpierymient, pra pastajannuju kazackuju achovu havaryć pakul rana, — paviedamiŭ u telefonnaj razmovie BiełaPAN načalnik aśvietnickaha adździeła Minskaha zaaparka Alaksandr Strohanaŭ.
— Adnak sama prysutnaść kazakoŭ na terytoryi zaaparka dyscyplinuje naviedvalnikaŭ, spyniaje raśpivańnie śpirtnych napojaŭ i kureńnie».
25 lipienia karespandent BiełaPAN razam z pachodnym atamanam RHA «Biełaruskaje kazactva», pałkoŭnikam Juryjem Jafimavym i atamanam Minskaj haradskoj kazackaj akruhi Hienadziem Žumiankom prahulaŭsia pa zaaparku.
Naviedvalniki z zadavalnieńniem fatahrafavalisia z kazakami. U cełym minčanie stanoŭča staviacca da takoha ekśpierymientu. Jak adznačyŭ adzin z naviedvalnikaŭ, z kazackim patrulom u zaaparku hulać ciapier «bolš spakojna, nie treba turbavacca pra siabie i dziaciej».
«Inicyjatyva ŭvieści patrulavańnie terytoryi kazakami była ŭniesiena dyrekcyjaj zaaparka, — paviedamiŭ u intervju BiełaPAN ataman Jafimaŭ. — Heta robicca dla taho, kab u zaaparku zachoŭvaŭsia paradak, praviły pavodzin hramadzian u hramadskim miescy, byli pavažlivyja adnosiny da bratoŭ našych mienšych žyvioł. Na žal, my nie možam dziažuryć tut u budnyja dni, pakolki źjaŭlajemsia hramadskaj arhanizacyjaj. Zaraz zakančvajecca dvuchmiesiačny stažyrovačny pieryjad dziažurstvaŭ, i z 9 žniŭnia kazaki buduć nieści sapraŭdnuju patrulnuju słužbu. Va ŭračystaj abstanoŭcy kazaki atrymajuć adpaviednyja paśviedčańni i ŭ vychadnyja dni buduć nieści słužbu ŭ adpaviednaści z Zakonam ab achovie hramadskaha paradku ŭ dobraachvotnaj hramadskaj družynie dapamohi milicyi».
Na dumku Jafimava, takaja dapamoha nieabchodna.
«Heta adna z asablivaściaŭ dziejnaści našaj arhanizacyi. U pierśpiektyvie sa žniŭnia na bazie zaaparka my płanujem arhanizavać kazackuju stanicu.
I heta budzie treciaja takaja stanica ŭ Biełarusi. Ich asnoŭnaja meta — vychavańnie moładzi, kab našy kadety avałodvali konnym sportam, tamu što kazak biez kania — nie kazak», — ličyć ataman.
Kamientary