«Hałasavaŭ suprać Łukašenki, što paćviardžaje pratesny charaktar jaho dziejańniaŭ». Prakuror zaprasiŭ try hady «chimii» dla palitviaźnia Mazhova
Sud Leninskaha rajona Minska razhladaje kryminalnuju spravu 26-hadovaha spartsmiena Aleha Mazhova, jakoha ŭtrymlivali pad vartaj try miesiacy, a potym vyzvalili pad padpisku ab niavyjezdie. Za ŭdzieł u mitynhu 9 žniŭnia jaho abvinavačvali pa č. 2 art. 293 Kryminalnaha kodeksa (udzieł u masavych biesparadkach), ale potym spravu pierakvalifikavali na č.1 art. 342 Kryminalnaha kodeksa (udzieł u dziejańniach, jakija hruba parušajuć hramadski paradak). 28 studzienia prakuror u sudzie zaprasiŭ dla Aleha try hady «chimii». Spravu razhladaje sudździa Julija Šut, paviedamlajuć pravaabaroncy.
Aleha Mazhova abvinavačvajuć u tym, što pryniaŭ udzieł u niesankcyjanavanym masavym mierapryjemstvie 9 žniŭnia, vychodziŭ na prajeznuju častku, pierakryvaŭ ruch transpartu supracoŭnikaŭ orhanaŭ unutranych spraŭ, prymušaŭ vadzicielaŭ Minsktransa ažyćciaŭlać vymušanuju stajanku. U sudovych sprečkach prakuror Ramanovič zajaviŭ:
«Abvinavačany hałasavaŭ suprać Alaksandra Łukašenki, što, zrešty, źjaŭlajecca jaho pravam, ale paćviardžaje pratesny charaktar jaho dziejańniaŭ».
Pavodle abvinavačvańnia, Mazhoŭ dziejničaŭ u viačerni čas, jaho aktyŭnyja dziejańni supravadžalisia hrubym parušeńniem hramadskaha paradku. Dziaržabvinavaŭca ličyć, što vina Mazhova dakazana całkam, tamu prosić sud pakarać jaho tryma hadami abmiežavańnia voli z nakiravańniem u papraŭčuju ŭstanovu adkrytaha typu.
Prysud budzie abvieščany 1 lutaha.
Kamientary