«Nijakaha aptymizmu». Juryj Hurski admoviŭsia ad prajekta IT-univiersiteta ŭ Biełarusi
Pradprymalnik Juryj Hurski ŭ intervju Forbes raspavioŭ, jak jaho kampanii ŭ Minsku dapamahajuć supracoŭnikam ź pierajezdam, i čamu jon admoviŭsia ŭdzielničać u prajekcie stvareńnia IT-univiersiteta ŭ Biełarusi.
— Nijakaha aptymizmu my nie adčuvajem. Situacyja (z vybarami) pakazała, što ciapier zakon u krainie nie vykonvajecca zusim, parušajucca pramyja normy kanstytucyi, tamu my nie možam dumać, što našy inviestycyi ŭ Biełarusi ŭ biaśpiecy. My razumiejem, što ŭsio heta moža być skončana za adnu siekundu, i heta vielmi sumna, — adznačaje pradprymalnik.
Pa słovach Hurskaha, Flo i Wannaby padtrymlivajuć supracoŭnikaŭ niezaležna ad taho, ci vyrašyli zastacca ŭ krainie, abo źjechać. Tym, chto zachacieŭ pakinuć krainu, kampanii dapamahajuć ź pierajezdam — apłačvajuć darohu da novaha miesca ŭ inšaj krainie, dapamahajuć aformić dakumienty i znajści žyllo.
Taksama Juryj Hurski raspavioŭ, što admoviŭsia ad udziełu ŭ prajekcie budaŭnictva IT-univiersiteta ŭ Biełarusi.
Pa słovach pradprymalnika, IT-univiersitet płanavałasia pabudavać «pa najlepšych zachodnich uzorach». «My dumali brać nie bolš za 1000-2000 čałaviek. My mahli b skazać vypusknikam, što tyja, chto budzie dobra vučycca, harantavana buduć pracaŭładkavany ŭ peŭny puł kampanij. Baćki byli b matyvavanyja addavać u taki ŭniviersitet talenavitych dziaciej», — kaža Hurski.
Zaraz, miarkuje pradprymalnik, padobnyja idei zanadta ryzykoŭnyja.
Kamientary