Praz pandemiju karanavirusa mnohija turysty admianili svaje pajezdki i sprabujuć viarnuć hrošy, spłačanyja za braniravańnie. Kali nie ŭdajecca damovicca z hatelem ci pieravozčykam napramuju, možna ŭładzić situacyju praz bank.
Havorka idzie pra takuju praceduru jak chargeback («zvarotny płaciež»). Jaje sens taki: kali klijent apłaciŭ pa kartcy pasłuhu, ale jamu jaje nie pradastavili, jon z pretenzijaj źviartajecca ŭ bank. Vysyłaje dokazy, bank raźbirajecca ź firmaj ci arhanizacyjaj, jakaja nie vykanała svaje abaviazki, i viartaje hrošy.
«Naša Niva» pacikaviłasia, ci jość taki servis u biełaruskich bankaŭ.
U niekalkich ustanovach paćvierdzili, što takuju pasłuhu akazvajuć.
«Klijent źviartajecca da nas z zajavaj, dadaje kopii kvitkoŭ, rachunkaŭ i dokazy, što pasłuha nie była jamu akazanaja», — tłumačać u «Priorbanku».
U «Alfa-Banku» taksama mohuć inicyjavać zvarotny płaciež.
«Kožny zapyt pa sprečnaj apieracyi my razhladajem indyvidualna, u adpaviednaści z praviłami mižnarodnaj apłatnaj sistemy — Visa ci Mastercard. Aformić zajaŭku i padać dakumienty, jakija paćviardžajuć apieracyju, možna dystancyjna abo ŭ adździaleńni. Kali bank znajšoŭ padstavy, kab viarnuć hrošy, klijentu varta źviarnucca ŭ adździaleńnie i zapoŭnić nieabchodnyja dakumienty. U niekatorych vypadkach jość mahčymaść adpravić pa elektronnaj pošcie skany papier i vyrašyć pytańnie dystancyjna», — apisvajuć paradak u «Alfa-Banku».
U «Biełarusbanku» raskazvajuć, što sa zvarotnymi płaciažami ich śpiecyjalisty sutykajucca štodzień.
«Jak praviła, bank inicyjuje dadzienuju praceduru pa mižnarodnych apieracyjach, u tym liku praviedzienych na zamiežnych sajtach. Naprykład, vy apłacili tavar ci pasłuhu, ale nie atrymali ich, i ŭ vas jość dakumienty, jakimi možna heta paćvierdzić. Inicyjavać praceduru apratestavańnia apieracyi bank moža na praciahu 120 dzion z momantu nieakazańnia pasłuhi albo zapłanavaj daty dastaŭki tavara», — kažuć u banku.
Dla heta treba padać zajavu, apisać situacyju i prykłaści dakumienty, jakija dakazvajuć, što vy sprabavali vyrašyć prablemu (admiena braniravańnia, pierapiska).
«Varta adznačyć, što pa rekamiendacyjach płaciežnych sistem trymalnik kartki pavinien sprabavać vyrašyć sprečnuju situacyju naŭprost z arhanizacyjaj handlu i servisu, jakaja pavinna była akazać pasłuhu abo dastavić tavar», — dadajuć u «Biełarusbanku».
Sutnaść pracedury takaja: kali ŭmoŭny hatel nie viarnuŭ vam hrošy, bank ź nieabchodnymi dakumientami źviartajecca z pretenzijaj da taho banka, jaki absłuhoŭvaje hatel. I toj druhi bank pavinien dakazać, što pasłuha vami była atrymana abo što admova ad pasłuhi supravadžajecca prymianieńniem štrafnych sankcyj. Nie dakaža — viartaje srodki.
Čas raźbiralnictva zaležyć ad terminaŭ, vyznačanych płaciožnymi sistemami.
Kamientary