U kancernie «Biełnaftachim» zajaŭlajuć, što pazicyja bujnych rasijskich naftavych kampanij, jakija zachoŭvajuć maratoryj na pastaŭku nafty ŭ Biełaruś, spryjała pryniaćciu rašeńnia polskaha apieratara «Družby» ab zapusku naftapravoda ŭ reviers na biełaruskim kirunku, paviedamlaje interfax.by.
«Dla Biełarusi adkryvajucca jašče adny dźviery ŭ śviet alternatyŭnych krynic pastavak nafty. Heta źmianiaje karcinu. Pa sutnaści, my nazirajem prykmiety tektaničnaha zruchu na rynku nafty ŭ Jeŭropie, jakomu spryjali nie tolki karanavirus, ale i pazicyja bujnych rasijskich hulcoŭ, jakija nakiravali namahańni biełaruskaha boku na pošuk alternatyŭnych krynic», — havorycca ŭ kamientary pres-sakratara kancerna «Biełnaftachim» Alaksandra Ciščanki.
«My viali pieramovy z PERN pa hetym pytańni. I kali raniej mahčymaść vykarystoŭvać hety kirunak aceńvałasia jak 50% na 50%, to ciapier jość vynik hetych pieramovaŭ — zajava polskaha apieratara pra mahčymaść reviersu», — padkreśliŭ jon.
«I heta dazvalaje bolš detalova razhladać hety varyjant pastaŭki nafty (…). Heta adkryvaje dla Biełarusi mahčymaść vieści pieramovy z pastaŭščykami syraviny razam ź jaje transparciroŭkaj pa hetaj bolš vyhadnaj maršrutnaj schiemie», — dadaŭ pres-sakratar.
Jak paviedamlałasia, polski apieratar mahistralnaha naftapravoda «Družba» PERN zajaviŭ ab mahčymaści prapampoŭki nafty z Polščy na terytoryju Biełarusi.
Raniej taksama paviedamlałasia, što delehacyja ŭrada Polščy naviedała ZŠA, dzie praviała kansultacyi ab miechaniźmie pastavak nafty z ZŠA ŭ Biełaruś praz polskija party.
Jak paviedamlałasia, u pačatku lutaha dziaržsakratar ZŠA Majkł Pampiea paśla pieramoŭ z Alaksandram Łukašenkam zajaviŭ ab hatoŭnaści ZŠA zabiaśpiečyć našu krainu enierharesursami na 100% pa kankurentnych cenach.
Kamientary