Dla ekskursij adkryli lamus u Hrodnie — samy stary draŭlany budynak Biełarusi
U testavym režymie pačalisia ekskursii pa terytoryi byłoha bryhickaha manastyra, dzie znachodzicca draŭlany lamus. Pa papiarednim zapisie turysty zmohuć ubačyć samuju staruju draŭlanuju pabudovu ŭ Biełarusi, jakuju praciahvajuć restaŭravać, paviedamlaje Hrodna.life.
Administratar infarmacyjna-turystyčnaha centra Hrodzienskaj katalickaj dyjacezii Hražyna Šałkievič raspaviała Hrodna.life, što na terytoryju abjekta buduć vadzić hrupy pa papiarednim zapisie.
«U turystaŭ vyrasła cikavaść da lamusa i tamu my pryniali rašeńnie pakul u testavym režymie prymać arhanizavanyja hrupy. Važna pahladzieć, jak usio heta budzie pracavać. Raniej na terytoryju manastyra ŭvachod byŭ zabaronieny z-za taho, što tam znachodziłasia budplacoŭka. Siońnia da lamusa možna budzie tolki padyści, ale ŭsiaredzinu puskać nikoha nie buduć — jašče nie skončylisia restaŭracyjnyja raboty», — raspaviała Hražyna Šałkievič.
U sam były manastyr turystaŭ puskać nie buduć, tam taksama iduć budaŭničyja raboty. Na dadzieny momant idzie padrychtoŭka zały, u jakoj u budučyni adkryjecca muziej Hrodzienskaj katalickaj dyjacezii.
Nie tolki lamus, ale i padvały kaścioła
Ekskursija na terytoryi byłoha klaštara biaspłatnaja, ale ŭsie žadajučyja mohuć pakidać achviaravańni na adnaŭleńnie abjekta. Ekskursijnyja hrupy mohuć zapisvacca pa telefonie: +375295825964.
Dla turystyčnych hrup taksama adkryty padvały byłoha klaštara, dzie znachodzicca muziej. Pa ich vodzić ekskursii rektar kaścioła Antoni Hremza. Trapić u padvały možna pa papiarednim zapisie.
Hrodzienski lamus — dvuchpaviarchovy dom z łodžyjaj na druhim paviersie i aračnymi halerejami na hałoŭnym fasadzie. Vykładzieny z masiŭnych brusaŭ, biez vykarystańnia klamaraŭ i mietaličnych krapiažoŭ. Vierahodna, pabudavany ŭ druhoj pałovie 18 st., choć i siońnia dzie-nidzie ŭ litaratury datujecca 1630 hodam.
Restaŭracyja lamusa pačałasia ŭ kastryčniku 2016 hoda. Kuryruje ŭsie pracy Ministerstva kultury i spadčyny Polščy. Za niapoŭnyja try hady było praviedziena poŭnaje abśledavańnie abjekta, byŭ zamienieny padmurak, nižni draŭlany vianok. Budynak padymali na damkratach, vyraŭnoŭvali. Na druhim etapie byli zamienieny ŭžo nieprydatnyja draŭlanyja elemienty — lamus byŭ pabudavany ź ihličnych parod draŭniny, taki ž materyjał vykarystoŭvaŭsia dla restaŭracyi. Na trecim etapie byŭ zamienieny dach. U jakaści pakryćcia vykarystany kołatyja doščački z asiny (honty). Viasnoj 2019 pačnucca stalarnyja i ŭnutranyja raboty.
Kamientary