Pakažuć 10 favarytaŭ narodnaha hałasavańnia fiestyvalu mabilnaha kino

Hetym ža viečaram na vialikim ekranie možna budzie ŭbačyć pieršy epizod novaha siezona jutub-sieryjała «Chaču damoŭ» Leanida Paškoŭskaha. Kab dałučycca da pakazu, nieabchodna prajści śpiecyjalny kinatest na sajcie fiestyvalu da 20 studzienia ŭklučna.

Sioleta ŭ konkursnaj prahramie Mižnarodnaha fiestyvalu mabilnaha kino velcom Smartfilm udzielničaje 334 raboty z bolš čym 60 krain śvietu. Ź Biełarusi — 71 rabota, kankurencyju im skłali videaese z Anhlii, Hiermanii, Ispanii, Italii, ZŠA, Japonii, Francyi. Jość i tyja, chto biaruć udzieł u fiestyvali ŭpieršyniu: režysiory ź Vienhryi, Vieniesueły, Karei, Siryi, Šviejcaryi i JUAR.

U śpis najlepšych, na dumku hledačoŭ, rabot uvajšli dzieviać filmaŭ ź Biełarusi — «Anioł na Rastvo», «Viera», «Kvatarant», «Efiekt Moli», «Terapija», «First day», «U hod śvińni», «Ja dapamahu tabie ŭstać» i «Narodžanyja ŭ cieni», a taksama adna rabota z Rasii — stužka «Vandroŭka» pra ŭzychodžańnie na Elbrus. Hetyja filmy i pradstaviać u miežach śpiecyjalnaha pakazu dla narodnaha žury, dzie šlacham vočnaha hałasavańnia hledačy vyznačać pieramožcu.

Akramia konkursnych rabot, upieršyniu na vialikim ekranie budzie pradstaŭlena piłotnaja sieryja treciaha siezona «Chaču damoŭ» — dakumientalnaha jutub-sieryjała biełarusa Leanida Paškoŭskaha. Novy epizod videadziońnikaŭ pryśviečany Tybietu: u svaim filmie Leanid raspaviadzie historyju rehijona, padzielicca svaimi ŭražańniami ad bahaćcia pryrody i asablivaściami žyćcia, paznajomić hledačoŭ ź niekatorymi kałarytnymi piersanažami, pakaža žyćcio kačavych pastuchoŭ tybieckich jakaŭ i pobyt zvyčajnaj tybieckaj haspadarki. Na jutub-kanale prezientacyja novaha siezona «Chaču damoŭ» adbudziecca ŭ lutym.

Kab stać siabram narodnaha žury i trapić na pakaz šort-lista, nieabchodna prajści kinatest. Jon uklučaje ŭ siabie 10 pytańniaŭ jak pra mastackija filmy, tak i pra stužki non-fikšn — adpaviedna temie fiestyvalu «Zasnavana na realnych padziejach». Vyznačyć pa kadru ź filma riežysiora, vykanaŭcu hałoŭnaj roli ci raskazanuju ŭ im sapraŭdnuju historyju, adroźnić vydumku ad realnaści, nazvać hierojeŭ filma, jakija isnavali ŭ rečaisnaści, — takaja zadača pad siłu tolki sapraŭdnym amataram kino. U vypadku paspachovaha prachodžańnia ispytu z vami źviažucca arhanizatary, jakija i paviedamiać detali budučaha mierapryjemstva.

Paralelna z narodnym hałasavańniem svaju adznaku filmam-udzielnikam vystaŭlajuć i siabry prafiesijnaha žury. Chto stanie najlepšym u kožnaj z naminacyj, a kamu dastanucca śpiecyjalnyja pryzy fiestyvalu — u naminacyjach «Najlepšy bajopik», «Najlepšy scenar, zasnavany na realnych padziejach», a taksama ŭ partniorskaj naminacyi #seemore ad Huawei, — možna budzie daviedacca ŭ kancy miesiaca: vyniki velcom Smartfilm-2018 buduć padviedzienyja 31 studzienia. Usie raboty z šort-lista fiestyvalu, a taksama niekatoryja filmy-pieramožcy minułych hadoŭ buduć dastupnyja dla prahladu ŭ śpiecyjalnym raździele videaservisu Voka.

Vośmy Mižnarodny fiestyval mabilnaha kino velcom Smartfilm — heta placoŭka dla realizacyi śmiełych idej i niezvyčajnych historyj u źniatym na smartfon karatkamietražnym kino. Deviz sioletniaha fiestyvalu — «Zasnavana na realnych padziejach». Arhanizatarami vystupajuć kampanija velcom i Ministerstva kultury Biełarusi, hienieralny partnior — kampanija Huawei.

• 0
• 0
• 0
• 0
• 0
• 0
• 0
• 0