U Čerykaŭskim rajonie Mahiloŭskaj vobłaści viadziecca budaŭnictva najbujniejšaj u Biełarusi fotaelektrastancyi (FES). Infarmacyja pra heta raźmieščanaja na sajcie kampanii «Biełzamiežbud», jakaja vykonvaje budaŭničyja i mantažnyja raboty, piša TUT.BY.
Bližniaja Rečyca - tak raniej nazyvałasia vioska ŭ Čerykaŭskim rajonie. Ciapier vioski niama, jość adnajmiennaje ŭročyščy ŭ zonie adsialeńnia paśla katastrofy na Čarnobylskaj AES. Tut budujecca Čerykaŭskaja FES, najbujniejšaja ŭ Biełarusi i SND, havorycca ŭ paviedamleńni.
Mahutnaść soniečnaj elektrastancyi składzie bolš za 100 MVt. Jana raźmieścicca na płoščy 220 ha.
100 Mvt — heta amal 1,5% ad ahulnaha spažyvańnia elektraenierhii Biełaruśsiu.
Pracy ŭ Čerykaŭskim rajonie pačalisia ŭ kancy kastryčnika, na abjekcie pracujuć kala 120 čałaviek i kala 30 adzinak budaŭničaj techniki.
Prajekt finansujecca kampanijaj «Kamieliasajd Limited» - daččynym pradpryjemstvam brytanskich Altostarta i United Green Group, jakaja śpiecyjalizujecca na vienčurnych inviestycyjach u adnaŭlalnuju enierhietyku.
Ahulnaja suma inviestycyj składzie bolš za 170 młn dalaraŭ. Krynicy finansavańnia - ułasnyja srodki i kredytnyja resursy mižnarodnych finansavych instytutaŭ.
Pastaŭka abstalavańnia i inžynirynh ažyćciaŭlajucca kitajskaj kampanijaj Power China Guizhou Engineering na ŭmovach «pad kluč».
Niamieckaja kampanija Ecap vystupić techničnym kaardynataram prajekta ŭ Čerykaŭskim rajonie, a taksama zojmiecca absłuhoŭvańniem FES paśla zaviaršeńnia budaŭnictva. Płanujecca, što stancyja budzie ŭviedziena ŭ krasaviku-mai 2019 hoda.
Čakajecca, što prajekt paspryjaje ekanomii valutnych resursaŭ za košt skaračeńnia impartu nafty i hazu. Abjekt taksama dapamoža vykarystać terytoryi, jakija trapili pad uździejańnie radyjacyi ŭ vyniku čarnobylskaj katastrofy, havorycca ŭ paviedamleńni «Biełzamiežbudu».
Atrymanaja alternatyŭnaja elektraenierhija budzie pastaŭlacca ŭ enierhasistemu Biełarusi.
Hod tamu kiraŭnik MZS Biełarusi Uładzimir Makiej sustrakaŭsia z dyrektaram irłandskaj kampanii «Ṕjua Enerdžy» Torstenam Mierkielem i abmiarkoŭvaŭ pierśpiektyvy raźvićcia adnaŭlalnych krynic enierhii ŭ Biełarusi, u pryvatnaści budaŭnictva soniečnaj elektrastancyi ŭ Mahiloŭskaj vobłaści. Da hetaha irłandski inviestar realizavaŭ u Biełarusi šerah prajektaŭ u halinie alternatyŭnaj enierhietyki.
Kamientary